Temsîlkarîya Îdareyê Rojawanî ya Berlinî seba hetkarîya tibî ya herême Berlin de konferansêk viraşt. Xeylêk selahîyetdarê îdareyê herême, doktor û xebatkarê weşîye tewrê konferansî bîyî. Konferans hetê Dr. Simon Beckerî ra ame îdarekerdene.

Hemserekê Heyetê Têkilîyanê Teberî Abdulkerîm Omerî bi rayîrê înternetî konferans de qisey kerd û bale ante gefanê vera Rojawanî û girîngîya hetkarîya merdimîye ser.

Hemserekê Heyetê Weşîye yê Rojawanî Dr. Ciwan Mistefa zî tewrê konferansî bi û ard ziwan ke  babeta weşîye de Rojawan de astengîy hema zî dewam kenê. Dr. Mistefayî vat: ''Vera gefê cuya 6 mîlyon merdimanê herême ganî ma sîstemêkê neweyî yê weşîye awan bikerê. Rewşa merdimanê ke şerî ra surgun bîye nêna dîyene. Rojawan de nêweşîya kolera tesîrê nêzdîyê 17 hezar kesan kerd. Ma heman wextî de şerê weşîye zî kenê.''

Mistefayî vist vîrî ke herême de hem hacetê weşîye hem zî xebatkarê weşîye kêm ê û waşt ke wa Rojawan de fakulteyê tibî bêro ronayene.

Dr. Basrawî Elîyî zî heman mesele ser o qisey kerd. Elîyî îfade kerd ke dewleta tirke seke qesasê Kobanê gêna bi droneyanê çekdaran hêrişê Rojawanî kena û vat: ''Cuya ke ma bi mengan seba weşkerdişê ci xîret kena, dewleta tirke cade pê droneyêkî gêna. Rojawan de nêweşîya Dîyabetî zêde ya. Ma dermananê dîyabetî Îdareyê Xoserî ra peyda kenê la ma rê nêvejîyenê.''

Zanîngehê Rojawanî ra Abeer Hassafî derheqê perwerdeyê tipî yê Rojawanî de agahîyî dayî û vat: ''Warê perwerdeyê tipî de ma 330 wendekarî mezun kerdî. Doktorî perwerdeyê bi 6 serran ra dima sey doktorê pêroyî mezun benê û dima seba pisporîye perwerde gênê.'' Hassafî waşt ke wa paştî bêra dayene fakulteyanê înan.

Antropologe Şermîne Guven zî konferans de vat: ''Nêweşxaneyan de meseleyê awe û ceyranî est ê.'' Guvene da zanayene ke nêweşîya kolera nê wextê peyênî de zêdîyaye û ganî vera kolera karêko hîra bêro kerdene.