Hemsereka Konseya Rayberdişî ya KCKyî Besê Hozat cewab da pesanê Meya Haber TVyî. Hozate derheqê eşkerayîya ke Rayber Apoyî ra yena pawitene û eşkerayîya mevzûatî ya Wezîrê Edaletî yê Yilmaz Tunçî de nê vatî:

''Ma eşkerayîya ya ke derheqê mevzûatî de ameye dayene bi şîdetî red kenê, qetî qebul nêken. Rayber Apo 26 serrî yo binê tecrîd û îzolasyonî de yo. No îşkenceyêk o, huqûqê mîyanneteweyîyî nê sey îşkenceyî, sey sûcê merdimîye pênas keno.  No hema dewam keno, tecrîd zî hema dewam keno. Sereyê teşrîna verêne ra, sere de Devlet Bahçelî îqtîdar veng danê Rayber Apoyî ke o veng bidê têgêrayîşî, veng bido rayrapêroyîye. Heta Devlet Bahçelîyî vat wa Rayber Apo bêro meclîs de qisey bikero. Bi mengan o wina eşkerayîyî yenê dayene, nika Wezîrê Edaletî vejîyeno vano 'eşkerayîya bidîmene goreyê mevzûatî nîya' No zî mojnaneno ke senî  cîddî nîyê, senî nizdîyê prosesî benê. O wext şima hay kay kaykenê? Şima wazenê se bikerê?

Xora ma roja verêne ra vanê, eke şima Rayberîye ra eşkerayîye pawenê, o wext sîstemê îşekce û tecrîdî yê Îmraliyî werte wedarê. No sîstem ganî werte ra bêro wedaretene. Bi nê sîstemî huqûq gerîyeno binê lingan. Tecrîdî wedarê ke wa Rayber Apo şertanê azadan de rolê xo kay bikero. Rayberîye vat 'tecrîd dewam keno,  eke şertî bibedilîyê ez rolê xo kay kena.' Pekî şertî bedilîyayî, şima Rayber Apoyî ra vengdayîş pawenê.  Ti Rayber Apoyî binê tecrîd û îşkenceyî de tepişenî û vanê wa eşkerayîya ey hetê kesanê bînan ra bêro wendene û şar û têgêrayîş ra pawenê ke wa çîyo ke hewce keno bikerê. No xîyalo veng o.Wa çew bi nê xîyalanê vengan xo mexapîno. Ma nê tewirê şenikî cîddî nêvînenê û goş pa nêkewnê.''

Hozatê eşkerayîya Serekê Meclîsî Numan Kurtulmuşî yê derheqê eşkerayîya Rayber Apoyî zî vist vîrî û wina dewam kerd. ''Eke serekê meclîsî na eşkerayîye zaf muhîm vîneno û vano eşkerayîya tarîxî ya, o wext ganî goreyê eşkerayîya tarîxî caardişêk bibo. Ganî ekerayîye bidîmen bo. Ma sey kadroyan, mîlîtanan û şervananê nê têgêrayîşî, şarê ma û dostê ma, heme hetê demokratîkî, heme komel, şarî ganî eşkerayîya Rayber Apoyî fekê ey ra goştarî bikerê û bivînê. Ganî ma Rayber Apoyî bivînê. Têna wa wina bawer kenê. Bi tewirê bînî nîno qebulkerdene. Ma eşkera vanê. Wina prosesê tarîxî de ma tewirê winayênî qebul nêkenê. No tewirê înan mojneno ke ê kay kaykenê.''

Bêsê Hozat ard ziwan ke Rayber Apo hazirîya destpêkerdişê hemleya tarîxî keno û nê vatî: ''Têkoşînê 50 serran û xoverdayîşê 26 serran Îmraliyî yê Rayberîye semedê çareserkerdişê meseleya kurdan û demokratîkbîyayîşê Tirkîya yo. Nika Rayberîye têkoşînê nê dano. Rayber Apo semedê şaran, heme nasnameyanê bindestan, cinîyan û merdimîye 26 serrî yo bi îdareyê xurtî Îmrali de xover dano. Hetê bînî ra zî vera hêriş û zextanê îqtîdarî têkoşîn yeno rayraberdene. Têkoşînê kurdan, têkoşînê hêzanê demokrasîyî, têkoşînê gerîlayan, hemleya azadîye ya globale îqtîdar kerd bêhêz. Netîceya têkoşînî de berê Îmraliyî bîyî a.

No proseso ke çew nêeşka nameyêk bido ci, Rayber Apoyî nameyêk na pa, prosesê bedilnayîşê demokratîkî, vat prosesê bedilnayîşî newera awankerdişî. Têgêrayîşê azadîye zî zerrî ra wayîrê nê vejîya rayapêroyîye rê pare kerd. Nika mabênê Rayberîye û dewlete te pêkerkerişêk çîn o. Dewlete û îqtîdar vera têkoşînî zor de mendî û mecbur mendê ke tecrîdî biney sist bikerê. Rayberîye têkoşînê şarî zî tengayîya dewlete zî vîneno. Rayberîye naye ser o înîsîyatîf aver berd. Rayberîye wazeno înîsîyatîfê bedilnayîşê demokratîkî aber bêro. Wazeno çarçewaya azadîya kurdan de demokratîkbîyayîşê girdî aver bêro. Wazeno hemleyêka girde aver bêro. Erdoxan fekê xo akeno vano 'PKK wa çeke caverdo' la bi kerdişanê xo vano çeke cameverdê.''