18ê sibate de vera HDPyî operasyon ame kerdene, 54 kesî ameyî destbendkerdene. Badê îfadeyan ke bi rojan kerd derg, 30 kesî ameyî tepiştene, 13 kesan rê cezaya hepsî ya keyeyî ameyî dayene û 7 kesî bi şertê kotntrolê edlîyî serbest ameyî veradayene.

Hema ke îfadeyan dewam kerdêne derheqê Hemşaredarê Esenyurtî Ahmet Ozerî de îdîaneme ame hazirkerdene. Îdîaname de ''peymana bajarî'' sey hedefî ameye mojnayene û HDK zî sey ''awanîya terorî'' ame pênaskerdene.

Wekîlê DEM Partî yê Mersinî Ali Bozanî ard ziwan ke nê pêro xizmetê waştişêkê polîtîkî kenê û bale ante operasyonanê ke bitaybetî bado ke Akin Gurlek bi Serdozgerê Komare yê Îstanbulî, ameyî kerdene ser.

Qiseykerdişê Alî Bozanî ra qismêk wina yo: ''HDK 14 serrî yo est o, badê 14 serran bîyo îlegal? Xora kesê ke ameyî tepiştene û cezaya hepsê keyeyî dîyaye ci pêro bêsûc ê. Telefonî ameyî goştarîkedene û badê 11-12 serran merdimî yenê tepiştene. No mojneno ke na mesele polîtîk a. HDK awanîyêka ke tede 40 ra zafêr partîyê sîyasîyî, dezgeh û sazgehî ca genê. Awanîya ke heme şarî, grûbê bawerî, hetê komelkî xo tede îfade kenê. Xora nê semedî ra hêrişê nê fîkrîyatî, modelê rexistine  kenê. Eynî wextî de bi nê operasyonê vera HDKyî mesaj danê komelî: 'Kam ke selam bido kurdan ez gena. Kam ke selam bido kurdan ez tepişnena.' Wazenî şaran bitersnê la pabesteyê HDKyî bi mîlyonan temsîl kenê. Ê nêeşkenê bi mîlyonna bitersnê.''

Alî Bozanî wina dewam kerd:''Bado ke Akin Gurlek bi Serdozgerê Komere yê Îstanbulî operasyonê vera paymana bajarî û HDKyî ameyî kerdene.Tîya awanîyêke est a ke sîyasetî serê hukmî ra dîzayn kena. Merkezê nê zî qesre bi xo ya. Formulê peymana bajarî AKPyî raya verêne  îqtîdarî ra da war kerd partîya dîyine. Coka îqtîdar nê vera xo sey tehdîtî vîneno û hêrişê ci keno. Fîkrîyatê HDKyî zî semedê înan tehdîtêk o. Çunke AKP  bi cîyakerdiş û wirdîkerdişî wazeno komelî dîzayn bikero. Îqtîdar sîyasetê xo cîyakerdişî ser o afirneno. La HDK tam eqsê nê, semedê têhetardişê şaran paştdayîşî ameyo ronayene. Nê semedî ra sebebê hêrişan zelal ê.

Bi qala kilme dozgerê ke tehqîqat da destpêkerdene û dadgerê ke ceza daye ê zî zaf hole zanê ke embazanê ma bîlasebeb girewtî û ê do siba bîr tehlîye bibî û beraat bikerê. La tîya de armancê înan no yo: 'Ez çiwext biwazî ez eşkena her kesî bigîrê û tepişê.' Waznê tersî vila bikerî. Çîyo winayên vera TUSÎADî zî ame kerdene. Şima kam benê wa bibê, karê şima çi beno wa bibo, eke şima vera îqtîdarî bivejê, 'ez do şima tepişê.' No ters yeno afirnayene.''