Artêşa tirke ya îşxalkere 14ê nîsane ra nata bi çekanê kîmyewîyan hêrişê gerîlayan kena. Rêxistina Yewîya Doktoranê Mîyannteweyîye ya Vera Şerê Atomî / Doktorê ke Berpirsîyarîya Komelkî Kirişenî (IPPNW) raporêk weşanabi û no rapor hêrişê kîmyewî reyna îsbat kerdî.

Rixmê hende belge û vengdayîşê rêxistinanê komelê sivîlî de Rêxistina Qedexekerdişê Çekanê Kîmyewîyan (OPCW) verê hêrişanê kîmyewîyan de bêveng a. Narey zî herinda OPCWyî de hukmatê Almanya eşkerayîye daye.

Hukmatê Almanya 19ê çeleyê 2022yî de roniştişê pers û cewaban ê Meclîsê Federalî de cewab da persê nuştekî yê Wekîla Partîya Çepe Andrej Hunko yê serê raporê IPNNWyî. Hukmatê Almanya cewab de pare kerd ke muxatabê nê persî OPCW yo ê nîyê.

Cewabo kilm nameyê hukmatî ser o hetê Şewirmenda Wezîrîya Karanê Teberî Katja Keul ra dîya û tede wina ame vatene: ''Hayîya ma pê raporê IPPNWyî û eşkerayîya Wezîrîya Pawitişî ya Tirkîya ya serê şuxilîyayîşê gazê çimvêşnayîşî est a. La agahîyêka bîna ke çimeyanê hukmatî bi xo vista destî çin a.''

Katja Keul bale ante ser ke Tirkîya 29ê nîsana 1997î de Peymana Qedexekerdişê Çekanê Kîmyewîyan îmza kerda û vat: ''Wexto ke Tirkîya bîye terefa na peymane dîyar kerd ke envanterê ci de qet yew çeka kîmyewîye çin a. OPCW bire dano ke Tirkîya goreyê na peymane têgêrena yan nê û Tirkîya xora mîyanê mekanîzmaya çimdarîye ya OPCWyî de ya.''