Hemserekê Konseya Rayberdişî ya KCKyî Cemîl Bayikî programêkê taybetî yê Stêrk TVyî de derheqê eşkerayîya Rayber Apoyî de ya ke yeno pawitene  bêra kerdene, erjnayîşî kerdî.

Cemîl Bayikî ard ziwan ke înan Rayber Apoyî ra mektubêk girwet û vat Rayberîye hemleyê ke cuwa ver dayebî destpêkerdene wazeno înan biresno hedefanê dahîna pîlan û wazeno meseleya kurdan zemînê şerî ra vejo û bikirişo zemînê demokratîkî.

Cemil Bayikî vat: ''Eşkerayîyê ke ameyî kerdene, munaqeşeyê ke ameyî kerdene şar, demokratan, roşnvîran, sosyalîstan ser o tesîro pozîtîf keno. Hata yew coşî zî afrineno, ma nê vînenê. Ma de ser zî tesîr kerd, coş û heyecano hol afirneno. La ganî her kes nê bizano ke ; Rayber Apoyî înîsîyatîfêk girewt, wazeno semedê şaran nê înîsîyatîfî bişuxulno. O wext ganî her kes destê Rayber Apo hêzdar bikero. O wext çîyo ke yeno waştene eşkeno bêro caardene.''

Cemil Bayikî vat: ''Xora perûne barê xo eşto milê Rayber Apoyî. No barêkê zaf giran o. Hem zî Rayber Apo wazeno şertanê Îmraliyî de bibo cewab. Wazeno nê waştişan û hêvîyan bîyaro ca û semedê nê xebityeno. Berpirsîyarîya ci gird a. Rayber Apoyî heta nika semedê xo çîyêk nêwaşt. Her çî semedê şaran û merdimîye kerd. Cunke Rayber Apo semedê xo nê semedê şaran û merdimîye ciwîyeno.''

Hemserekê Konseya Rayberdişî ya KCKyî Cemil Bayikî bale ante ser ke tecrîdê Îmraliyî dewam keno û nêzdîbîyayîşê dewlete yê prosesî şermezar kerd û vat: ''Seba ke proses bêro domnayene ganî şertê azadîye yê Rayber Apoyî bêrê caardene. Eke şertê û mercê Rayber Apoyî mêrê bedilnayene, azad têkoşîn mekero nê hêvîyî senî yenê caardene? Senî eşkeno cewabê vengdayîşan bido? No mumkun nîyo.

Ganî tecrîd cade bêro wedaritene. Rayber Apo cade bibo azad. Ganî her kes semedê azadîya fîzîkîye ya Rayber Apoyî têkoşîn bikero. Eke Rayber Apo fîzîkî bibo azad eşkeno têgêrayîşî reyde tekîlî rono, her kesî reyde tekîlî rono, qisey bikero, fîkîr û vernîyazan bigîro. Eke şima wazenê şerî werte ra wedarê, o wext şertanê Rayber Apoyî bibedilnê. Ganî sîstemê Îmraliyî bêro wedaritene.''