Wekîla Partîya Çep a Keske ya Dîlokî Sevda Karaca Demîr ard ziwan ke turo diyîn ê weçînayîşê serekkomarîye do sey referandumî bibo û vat: ''Cinîyî do bi weçînayîşê Kiliçdarogluyî peynîya îdareyê şexsî yê Erdoganî bîyarê.''
Wekîla Partîya Çep a Keske ya Dîlokî û Endama Heyetê Rayberdişî ya EMEPî Sevda Karaca Demîr derheqê turê diyînî yê weçînayîşê serekkomarîye yê 28ê gulane de ANFyî rê qisey kerd.
Demîre pare kerd ke îqtîdarê AKP-MHPyî seba çinkerdişê destkewteyanê cinîyan, heqanê demokratîkan û azadîyan bikero. Demîre îfade kerd ke ganî cinîyî vera ney pê perspektîfêkê hîrayî têkoşîn bikerê û yew bibê.
Demîre vat: ''Ganî ma hacetanê xo yê têkoşînî zî bizêdînê ke Meclîs zî nînan ra yew o. Turo diyîn ê weçînayîşê serekkomarîye sey referandumî do derbaz bibo. Seba ke ma rayîranê têkoşînî biafernê vera Erdoganî paştî danê Kiliçdarogluyî. Erdogan û mutefîqê ci pê bernameyêkê giranî hêrişê têkoşînê cinîyan kenê. Cinîyî coka nê weçînayîşan de wa raya xo bidê Kemal Kiliçdarogluyî û bi weçînayîşê Kiliçdarogluyî peynîya îdareyê şexsî yê Erdoganî bîyarê.
Ma venga pêro cinîyan danê ke seba binvistişê Erdoganî raya xo bidê, wayîrê sindoqan vejîyê. Cinîyî wa bi erkanê xo têbigêrê û heta peynî têkoşîn bikerê. Ma do narey ser bikewê.''
