Torra Data û Perwerdeyî (EBA) nameyê Jiyanî ''bêusul û qedexe'' name kerd û red kerd ke mamostayî/e wendekarî/e rê bernameyê dersî bierşaw. Komeleya Cigêrayîş, Kultur, Huner û Ziwanî (DÎSA-DER) vera na mesele nêrazîbîyayîşê xo mojna. Komele derheqê babete de bi kurdkî û tirkî eşkerayîye daye û nê çîyî vatî:

''Ronayîşê komare ra heta nika vera kurdkî polîtîkayê asîmîlekerî dewam kenê. EBA de zî na hîşmendîye xo mojna ra. Wan de wendekarêkê/a bi nameyê Jiyanî/e ra semedo ke nameyê ci 'bêusul û qedexe yo' bernameyê dersî nêrşawîyayî. Ma sey DÎSA-DERî nê nêzdîbîyayîşî bi hawayêkê xurtî şermezar kenê. Jiyan/e nameyêko kurdkî yo û bêusul yan zî qedexe nîyo. Selahîyetdarî ganî cade na xeletîye ra fek vera bidê. Ma sey DÎSA-DERî venga pêro şarê kurdî, dezgehanê demokratîkan, dezgehanê kurdan, rêxistinanê komelê sivîlî danê ke vera na polîtîkaya cîyakere tewirê xo bimojne û kurdkî her warê cuye de bixebitnê.''