Meclîsê Ciwanan ê HDPyî yê Dêrsimî bi nameyê 'Ciwanî ameyoxî nîqaş kenê' aktîvîteyêke serûber kerde. Wekîlê HDPyî Alîcan Onlu, Sezaî Temellî û Dêrsime Dag û xeylêk wendekarê Zanîngehê Munzurî tewrê aktîvîte bîyî. Salona aktîvîte de pankarta 'Şitilê azadîye zanîngehan de zîl danê' daliqîyaye. 

Wekîla HDPyî û Vervatoxa Meclîsê Ciwanan ê HDPyî Dêrsime Dag aktîvîte de qisey kerd û îfade kerd ke ganî ciwanî ameyoxî nîqaş bikerê û vat: ''Sîstem ziwan, kultur û herra ke tede ciwîyenê û cuya şaran çîn hesibneno. Eke ma ewro ameyoxê xo nîqaş kenê, no ameyoxê ciwanan o. Coka ganî ciwanî nîqaş bikerê. Sîstem ewro tewr zaf hêrişê waranê ciwanan keno ke verê ciwananê xoverdayoxan bîgêro.Vera nê sîstemî êyê ke tewr zaf têkoşîn kenê zî ciwan ê. No sîstem konser, festîval, tîyatro û çîyanê bînan qedexe keno. Seba azadîye xoverdayîşêko pîl lazim o. Ewro wazenê şexsê Dêrsimî de estbîyayîşê kurdan çîn bikerê. Coka hêrişê vera Dêrsimî hêrişê vera ciwanan kenê.''

Sezaî Temellîyî zî ard ziwan ke sîstemo kapîtalîst tewr zaf hêrişê ciwanan keno û vera ney ganî sîyasetê ciwanan bêro kerdene. Temellîyî vat: ''Tezê Ocalanî venga sîyasetê ciwanan danê. Sîyasetê ciwanan no çîyo ke nêkeweno mîyanê lapanê statukoyî.''