Hetkarê Hemserekanê HDPyî yê Huqûq û Heqanê Merdiman ra Berpirsîyar Umît Dedeyî yo ke tewr peyêne Hemserekê KCDyî Berdan Ozturkî reyde Zîndanê Patnosî de cigêrayîş kerd, ANFyî rê qala rewşa peyêne ya zîndanan kerde.

Dedeyî vat Zîndanê Patnosî de cendirmeyan hêverî nêverda ê debikewê zere dima zî têna o girewt zere û Ozturk teber de mend. Dedeyî vat goreyê vatişanê tepişteyanê Zîndanê Patnosî Zîndan 40 rojî verê cû ame dezenfektekerdene. Dedeyî vat: ''Sabun û deterjan kêm ê. Zor danê tepişteyan de kantîn ra malzemeyan bigêrê. Koxûşî qerebalix ê. Awe nêdîyena koxuşan. Awa germe zî hewteyêk de rey dîyena. Tepişteyê nêweşî nêwazenê şorê zîndan. Înan kenê hucreyê yewkesî.Sey parî emser zî awa kanalîzasyonî kewte mîyana awa şimitişî. Cemê nanî zî kêmîyayî. Zîndan rojêk de têna rayêk nan dano tepişteyan.

Wezîretê Edaletî Gulî eşkera kerd ke 120 tepişteyî pê vîrusê Korona kewtî. Na hûmara zaf zêde ya û ma vanê qey hûmara raştikene zî yêna mîyankerdene.

Ma wextê qanûnê înfazî de selahîyetdaranê AKPyî reyde pêvînayîş kerd. Ma înan rê vat ke meseleyanê zîndanî de ma eşkenê înan rê hetkarîye bikerê la înan ma de dîyalog nêkerd. Pêşnîyazê AKP-MHPyî bîyî qanûn. Xora no vurnayîş vîrusê Korona ra ver zî estbî. Îqtîdarî vîrusê xo rê bahane dîye. Zîndanan de rîsk esto û no rîsk her kesî rê gef waneno. Qaşo pê nê qanûnê înfazî tepişteyê nêweşî û kokimî do biameyêne vera dîyene la wina nêbi.

Tepişteyê ke terefgîrê AKP-MHPyî bîyî vera dîyayî.Zîndanan de gefê vîrusî dewam keno. Vanê ke 120 kesî yenê weşkerdene la goreyê ma na hûmara zêdêr a. Berpirsîyarê ney zî îqtîdar o.''