Hetkarê Hemserekanê Pêroyîyan ê HDPyî Umît Dedeyî bi wesîleya 10ê Kanûne Roja Heqanê Merdiman a Dinya bînaya merkezî ya HDPyî de kombîyayîşê çapemenîye kerd û rojdem ercna.

Qiseykerdişê Dedeyî ra beşêk wina yo: ''Garîbe Gezer dinyaya xo bedilnaya. Emrê ci bi temamî pê binpaykerdişanê heqanê merdiman vîyart. Birayê ci şer de kişîya, birayê ci yo bîn çalakîya protestoyî de felç mend. Garîbe zî tepişîyaye û Zîndanê Kandira de raşta tecawuzê gardîyanan ameye. Derheqê nê gardîyanan de çîyêk nêame kerdene la cezaya hucreyî dîyaye Garîbe. Vizêr zî aye hucreyê xo de dinyaya xo bedilnaye. Destûr nêdîya ke avûkatî şorê zîndanî.

Ziwanê îqtîdarê AKP-MHPyî ziwanê şîdetî yo. 7ê gulane de Dêrsim de Murat Yildiz pê SÎHAyan kişîya, 30ê temmuze de nîjadperestan 7 ferdê keyeyê Dedeogullariyî kiştî. Derheqê qirkerdişê keyeyê Dedeogullariyî de 13 kesî ameyî destbendkerdene la 12 tenî dima vera dîyayî. No kerdiş huqûqî nîyo. Merdim eşkeno kişîyayîşê Denîze Poyraz polîtîkayanê nîjadperestan ra cîya îzeh bikero?

Îqtîdarî 20ê adare de Peymana Îstanbulî betal kerdî. Serra 2021î seba cinîyan bîye serra şîdet û cînayetan. 11 mengan de 310 cinîyî kişîyayî û bi hezaran cinîyî raştê şîdetî û hêrişê cînsîyî ameyî.

Bêtehamulîya vera kurdkî 2021 de zî zêdîyaye. Destûr nêdîya de Vervatoxa TJA Ayşe Gokkan mehkeme de bi kurdkî pawitişê xo bikera. Bedlîs de tabelaya kurdkî wedarîyaye. Wekîle Ayşe Surucu vizêr waşt Meclîs de kurdkî qisey bikera la mîkrofonê ci ame qefilnayene.

Dewaya Kobanê bi îdîanameyê 3530 rîpel û 370 klasoran dest pêker. Pê wedarîyayîşê bira nimite ya serê dosya kumpasê dewa vejîya werte. Serra 2021î de reyna tepişteyê nêweşî vera nêdîyayî. Mehmet Emîn Ozkan rixmê nêweşîyan û kokimîya xo zî vera nêdîyeno ke nika servîsê ciewnîyayîşê giranî de yo. Rixmo ke Fakulteyê Tipî yê Kocaelî raporê 'nêeşkena zîndan de bimana' dayo Aysele Tugluk hema zî tepişîyena.

5 serranê peyênan de teda û binpaykerdişê heqanê tepişteyan zêdîyayî. Tecrîdê Îmraliyî pê qedexeyê pêvînayîşan û binpaykerdişê bira MHME dewam keno. Sîstemê tecrîdî yê Îmraliyî zîndananê bînan rê zî vila beno. Birêz Ocalanî verî vatbi 'Eke firsend bidîyo mi ez eşkena hewteyêk de meseleya kurdan çareser bikera.' Coka vera ey tecrîd yeno caardene. Tecrîdê Îmraliyî nêno qebulkerdene. Zîndanê Îmraliyî cayê hêvîya haştîye û çareserîya meseleya kurdan o. Coka vera tecrîdî têkoşînê ma do dewam bikero.''