Dewaya qefilnayîşî de HDP ganî heta 21ê nîsana 2022yî pawitişê xo bido Mehkemeya Qanûnê Bingeyîyî (MQB). Hetkarê Hemserekanê HDPyî Umît Dedeyî derheqê rewşa peyêne ya dewa de ANFyî rê qisey kerd. 

Dedeyî da zanayene ke ê do 21ê nîsane ra verî pawitişê xo teslîmê Mehkemeya Berze ya Temyîzî bikerê û dima zî pawitişê xo yê fekkîyî bikerê. Dedeyî bale ante ser ke îdîanameyê vera HDPyî huqûqî nîyo. 

Dedeyî vat: ''Îdîanameyo verên ê MQByî seba ke tede nakokîyî est bîyî ame redkerdene. Pê nê îdîanameyê diyînî zî derheqê HDPyî de bira qefilnayîşî nêna dayene. Ma pê delîlan pawitişê xo de îsbat kerd ke na dewa bi armancanê sîyasîyan 2015 ra nata yena amadekerdene. Ma zanenê ke îqtîdar ho dezhehê hukmkerdişî rê şikl dano û ferasetêkî awan keno. Sîyasetmedarî û partîya îqtîdarî mehekeme ser o teda kenê. Bahtîyar Çolako ke no îdîaname qebul kerdo yew çete yo. Mumkîn nîyo ke karê ey sey karê huqûqî bêro hesibnayene.''

Dedeyî îfade kerd ke înan tim waşt ke serebûtê Kobanê bêrê cigêrayene û vat: ''Vernîyazê ma yê persan tim hetê AKP-MHPyî ra ameyî redkerdene. Ne MÎTî ne zî Wezîrîya Karanê Zereyî nê serebûtan ser o tehqîqatêk nêkerd. La embazê ma tim ameyî sûcdarkerdene. Mesuldarê nê serebûtan nika muştekî yê. Dewaya qefilnayîşî bi nê hawayî dewam kena û qet yew erjê ci yo huqûqî çin o. Mehkemeya Heqanê Merdiman a Ewropa derheqê Demîrtaşî de bira binpaykerdişî dabî. Rixmê ney zî bêhuqûqîye dewam kena.''