4ê Gulana 1937î de hetê Heyetê Wezîran ê dewleta tirke ra bira Terteleyê Dêrsimî yê bi nameyê ''Tunceli Tenkil Harekati'' amebî dayene. Federasyonê Komeleyanê Dêrsimî (DEDEF) derheqê serrgêra 83. ya na bire de eşkerayîyêka nuştekîye daye.

Eşkerayîye de ame vîrvistene ke semedê janî ra emser yadkerdişêko komkî do nêro kerdene. DEDEFî venga merdiman da ke qurbananê Terteleyê Dêrsimî keyeyanê xo de pê ogîtan û findan yad bikerê.

Eşkerayîye de wina ame vatene: ''Pê bira 4ê gulane goreyê hûmaraya fermîye 16 hezar kesî goreyê hûmaraya nêfermîye zî 70 hezar kesî ameyî qetilkerdene. Bi desan kesî bi hawayêkê zorî ameyî koçkerdene. Seba dêrsimijan 4ê gulane rojêka reş a. Ma wazenê ke ma na roje seba merdimanê xo dûa bikerê, înan yad bikerê, seba vîrameyîşanê înan findan bivisnê ta û medyaya komelkîye ser o tewir bi tewirî yadkerdişan bikerê. Ma wazenê ke qirkerdişê ke cografyaya ma de ameyî kerdene wa bêrê zanayene, ziwan û kulturê ma bidîyê ciwîyayene. Ma wazenê ke 4ê Gulane sey Terteleyê Dêrsimî yê 37-38î bêro qebulkerdene û merdeyanê ma rê hûrmet bêro mojnayene. Ma venga pêro dezgehanê demokratîkan, endamanê komeleyanê ma û dostanê Dêrsimî danê ke 4ê gulane de cayê xo de findan bivisnê ta û ogîtan vajê. Wa arşîvî bêrê akerdene, nameyê Dêrsimî tepîya bêro dayene, şarê Dêrsimî ra efû bêro waştene, lîsteya surgunan, vînbîyayeyan û domananê ke dîyayê keyeyan ê bînan bêra eşkerakerdene, cayê gorê Seyîd Rizayî û ê embazanê ey bêro vatene, ziwan û bawerîya ma ya Qizilbaşî bêrê azadkerdene, projeyê talankerdişê xozaya Dêrsimî wa bêrê batalkerdene.''