Vervatoxa DEM Partî Ayşegule Dogan derheqê Xerîtaya Rayîrî ya ke  kombîyayîşê Heyetê Rayberdişî yê Merkezî de ame munaqeşekerdene, kombîyayîşê çapemenîye kerd.

Ayşegule Dogan ard ziwan ke ê paştî danê vengdayîşê tarîxîyî û nê vatî: ''Seba ke Vengdayîşê Haştîye û Komelê Demokratîkî bêro caardene çîyo ke destê ma ra yeno ma do bikerê. Ma sey DEM Partî semedê girewtişê înîsîyatîfî hazir ê.  No vengdayîş her kesî rê ame kerdene. Coka kam ke haştîye û çareserî wazeno muxatabê ci yo. Xora esil muxatabî îqtîdar û dewlete yê. Nika raşta zî wextê ci yo ke çîyo ke ame vatene bêro kerdene.  PKK zî adirbirnayîş îlan kerd ke ma pê nê keyf weş ê. Nika dewlete û îqtîdar gerek semedê caardişê vengdayîşî çîyo ke hewce keno bikero. Ma sey DEM Partî veng danê. Lezkerdiş muhîm o. Coka gerek semedê caardişê nê vengayîşî de çîyo ke hewce keno bêro caardene. Gerek çarçewaya qanûnî de pê gamanê pêtan cewabê vengdayîşî bêro dayene ke qesawtî werte ra bêrê wedaritene. Ma bi serran o vanê aderesê çareserî û haştîye Birêz Ocalan o. Hema bêrê Îmraliyî tam anêbîyî zî fîkranê Birêz Ocalanî hewayê Tirkîya bedilna.

Ma 8ê Adare de têhetameyîşanê cinîyan hazir kenê. Newroze zî yena. Ma semedê Newroze zî bi nê coşî û hêvî hazirîya xo kenê. Reyna ma sey DEM Partî rojanê verê xo de newera vejîyenê waran. Ma têhetameyîşanê şarî yê Vengdayîşê Haştîye û Komelê Demokratîkî bikerê. Ma do 101 merkezan de Îzmîrî ra heta Şirnexî, Colemêrgî ra heta Manîsa, Trabzonî ra heta Îstanbulî biresê her cayî. Ma do her kesî rê qala haştîye bikerê. Çunke ma kewtî yew dewrî ke ma do pêro pîya haştîye înşa bikerê. Semedê ma perûne pelo newe beno a. Ma pêro pîya nê pelî pirr bikerê. Tim xerîtaya ma ya rayîrî estbî. Xora programê ma naye ser o.''