Hêrişê dewleta tirke ya vera Rojawan û Başûrê Kurdîstanî dewam kenê. 6 menganê peyênan de 6 rojnamegerê kurdî bi droneyanê çekdaran ê dewleta tirke ameyî qetilkerdene. Hêrişê dewleta tirke yê vera Tişrînê Rojawanî zî dewam kenê. Şaro sîvîlo ke awbendî paweno her roje raştê hêrişê dewleta tirke yeno. Heta nika bi desan sîvîlî ameyî qetilkerdene.

Avukat Georges Henri Beauthierî  derheqê qirkerdişê dewleta tirke de yê ke pê droneyanê çekdaran ameyî kerdene, ANFyî rê qisey kerd.

Beauthierî  vist vîrî ke ey derheqê hêrişanê dewleta tirke yê vera Başûrê Kurdîstanî de Şingal  û Mexmûr de cigêrayîş kerd û nê vatî: ''Sîvîlî ameyî qetilkerdene. Merdim nêeşkeno înan ra bawer bikero. La ma şîyî ûca û bi çimanê xo dî. Rewşe texemînanê ma ra xirabêr bî. Rojnamegerê ke Şingalî zanî înan zî nêzanayêne ke ûca keyeyanê şarî de çi qewîmîyeno. Ma Şingal de merkezê kulturî zîyaret kerd, dima ra merkez raştê hêrişî ame. Dewleta tirke Kitabxaneyê Şingalî de domanêk qetil kerd. 5-6 rojnamerê ke şîyî Mexmûr û Şingal ameyî kiştene. Dezgehanê mîyanneteweyîyî derheqê nê de raporêk nêwaşt.

Droneyê ke bi waştişê keşîfî şawîyenî hêriş kenê. Nê droneyê kiştoxê. Seserra 21. de kewnê sînorê yewna dewlete û sîvîlan qetil kenê. Çîyo winayên nîno qebulkerdene. Ganî rewşe her cade bêro qiseykerdene. Şaro ke keyeyê xo de yo dironeyêko hêrişkar yeno kişeno. Hinî heps û dadgerê cipersayîşî ya zî mahkemeyî hewce nêkenê.Têna hedef yeno bewlîkerdene û çew yeno kiştene. Iraq de tewr tay 10 baregehê droneyan ê dewleta tirke est ê. Dewleta tirke şina herra yewna welatî de bi droneyan hêriş kena û Neteweyê Yewbîyayeyî nê rê çimanê xo geno. Ez wazena reyna şirê herême la têna nêbeno. Ganî dezgehê eleqedarî ma wezîfedar bikerê. Waştişê ma o yo ka ma sey wezîfedarî şirê herême ke ma nê qirkerdişan dinya rê bidê eşnawitene.''