Bajarê Cenevre yê Swîsre de endamanê Platformê Ziwanê Kurdkî postaxaneyê bajarî de ameyî têhet  û bi wesîleya 21ê Sibate Roja Ziwanê Dayike Rêxistina Perwerde, Zanistî û Kulturî ya Neteweyanê Yewbîyayeyan (UNESCO) rê mektub şawit.

Bado ke mektub ame şawitene eşkerayîye ameye dayene û nê ameyî vatene: ''Ma sey kurdanê ke çar parçeyanê Kurdîstanî ra ameyî têhet ma Cenevre de Platformê Ziwanê Kurdkî na ro. Ewro ma bi wesîleya Roja Ziwanê Dayike UNESCOyî rê mektub şawit. Ma mektub de waştişê xo yê semedê ziwanê dayîke ardî ziwan. Reyna ma waşt bi UNESCOyî rî bi rî pêvînayîş bikerê. Ma wazenê platformê xo dahîna xurt bikerê û  kurdkî dahîna vila bikerê. Ma sey kurdanê ke diaspora de ciwîyenê ma do çar parçayanê Kurdîstanîr ê paştdayîşê xo bidomnê.

Mektubo ke hetê Platformê Ziwanê Kurdkî yê Cenevre ra UNESCOyîr ê ame şawitene de bale ameye antene zextê vera kurdkî yê çar parçayanê Kurdîstanî ser û ame vatene ke heqê ziwanê dayîke heqê bingeyî yê heqanê merdiman o. Mektub de madeyê 26. yê Beyannemeyê Globalî yê Heqanê Merdiman ame vîrardene û ame vatene ke her kes wayîrê heqê perwerdeyê ziwanê dayîke yo. Mektub de bale ameye antene poltîkayanê asîmîlasyonê yê herêmanê Kurdîstanî ser û waştişê semedê ziwanê kurdkî ameyî rêzkerdene.