Tirkîya de 23ê nîsane sey 'Roşanê Domanan û Serdestîya Neteweyîye' yeno fîrazkerdene. Endama Komîsyonê Heqanê Domanan ê ÎHDyî Cansu Yumuşak derheqê rewşa domanan a Kurdîstanî û Tirkîya de ANFyî rê qisey kerd.

Cansu Yumuşak îfade kerd ke na rewşe de ke şerî dewam kenê, domanî waranê îşxalkerdeyan de yenê qetilkerdene û mesuldarî yenê cezakerdene, çew nêeşkeno qala 'roşanê domanan' bikero.

Yumuşake da zanayene ke şer tesîrê pêro domanan keno û serê prosesê resayîşê domanan de texrîbatanê pîlan virazeno. Yumuşake vat: ''Şeran ra psîkolojî û bedenê domanan xeripîyenê. Domanî mîyanê şeran de zehmetîya vêşanîye, xela û astengîya tedawîbîyayîşî ancenê. Goreyê raporanê ma bi taybetî domanê multecîyî hem maruzê travmayanê rayîrê multecîtîye û şerî benê, hem zî welatanê bînan de maruzê cîyakerîye benê. Nê domanî karanê zehmetan de dîyenê xebitnayene, dibistanan de zehmetîya ziwanêkê xerîbî ancenê û heqê perwerdeyî ra dûrî visîyenê.''

Yumuşake bale ante domananê Kurdîstanî ser û vat: ''Domanî cilanê xo de û kuçeyan de wexto ke kay kenê pê wesayîtananê zirxînan yenê qetilkerdene. No îşxalê warê sivîlî yo. Nê kerdişan de sûcdarî nênê cezakerdene coka hîna bi çêr benê û hûmara nê serebûtan zêdîyena. 2008-2022 de 49 domanî hetê wesayîtanê zirxînan ra ameyî birîndarkerdene û 25ê nê domanan zî dima dinyaya xo bedilnaye. Adare de Riha de warê guleeştişê polîsan de cenazaya Muharrem Aksamê 16 serrî amebî dîyene. Ma na dewa teqîb kenê. La ama eşkenê vajê ke delîlî ameyê tarîkerdene. Nê mergan ra dewlete bi xo mesuldar a. Hêzê çekdarî û wesayîtê zirxînî ganî waranê domanan de têmegêrê. Nê 'qeza û peygoşkerdişî' benê sebebê cînayetanê ke nênê qebulkerdene.''