Sereka Komîteya Rayberdişî ya Meclîsê Sûrîyeya Demokratîke (MSD) Îlhame Ehmed paytextê Almanya Berlin de tewrê kombîyayîşê şarî bîye. Kombîyayîşo ke hetê Komeleya Rojawanî ya Berlinî ra heyatê Rosa-Luxemsurgî de ame kerdene Îlhame Ehmed rojdem ercna.

Îlhame Ehmed vat: ''Şerê Ukrayna de tewr zaf şarê ke a herre de ciwîyenê û komelê Rojhilatê Mîyanênî zirar vînenê. Badê şerê Ukrayna şerê Sûrîye ame cemidnayene. Hinî çew qala ci nêkeno. Sûrîye sey hîrê leteyan ameya cîyakerdene. Rejîmê Sûrîye, herêmê ke Tirkîya îşxal kerdî û Îdareyê Xoserî yê Rojawanî. Mabênê nînan de sînorê zelalî ameyî ronayene ke tira ravêrnayîş zehmet o.

Tirkîya Rojawan de cayanê ke bewlî kena hêrişê ci kena. Efrîn de şerê qirkerdişî yenê kerdene. Tirkîya xo sey îşxalkerî nêhesibnena. Vana uca çeteyî estê û mesûlîyetî ra remena. Fermî nêbo zî Efrîn pabesteyê Dîlokî û Serêkanîyê û Girê Sipî zî pabesteyê Riha yê. Ganî şarê Efrîn, Serêkanîyê û Girê Sipî yê ke Ewropa de yê semedê Efrînî dewa abikerê. Tîya merkezê ma est ê. Vera îşxalî Efrînî ganî şarê ma şiro mehkemeyanê mîyanneteweyî. Ma do pê Efrînî peyser bigêrê. Rojawan de tehdîê DAÎŞî dewem keno. Têna ma qala çareserî kenê ê bînan ra veng nêvejîyeno.''

Ehmede bale ante muhîmîya yewîya kurdan ser û  derheqê tekîlîyanê xo yê bi Başûrî de zî nê vatî: ''Dîyalogê ma bi îdareyê Hewlêrî vinderto. Qetilkerdişê gerîlayan dîyalogî qedîneno. Qicê şarê Rojawanî zî gerîla yê. Nika Rojawan ver bi statuyî şino û Başûr de statu tehluke de yo. Ganî nika heme kurdî derheqê statuyê kurdan de bifikîrîyê û pîya têkoşîn bikerê. Eke ewro PKK biqedîyo siba dorê yena hukmatê Hewlêrî. Prosesê referandumî bîyarê xo vîr. PKK îradeyê ucayî nas kerd la dewleta tirke pê îşxalî tehdît kerd. Ganî hukmatê Başûrî tekîlîya xo bi Tirkîya semedê destkewteyanê kurdan bişuxulno.''