Emîne Şenyaşara ke mêrde û di lajê ci hetê merdimanê Wekîlê AKPyî Îbrahîm Halîl Yildizî ra kişîyayî lajê xo Ferît Şenyaşarî reyde 280 rojî yo verê Edlîyeya Riha de nobeta edaletî gêna.

Hetkarê Hemserekanê HDPyî Umît Dedeyî keyeyê Şenyaşarî zîyaret kerd. Endamanê Komeleya Huqûqnasanê Seba Azadîye (OHD) Dede pêşwazî kerd. Dedeyî da zanayene ke ê sey HDPyî tim hetê Şenyaşaran de yê û dewa teqîb kenê.Ferît Şenyaşarî wextê zîyaretî de vera polîsanê ke dîmenî girewtêne nêrazîbîyayîşê xo mojna û vat: ''Şorê dîmenanê kiştoxan bigêrê.''

Heyetê HDPyî ra dima endamanê Koma Muzîkî ya Bajarî û îdarekarê Konfederasyonê Sendîkaya Kedkaranê Umûmîye (KESK) ameyî û keyeyê Şenyaşarî zîyaret kerd. Hemserekê KESKî yê Riha Mehmet Bozgeyîk zî zîyaret de amade bi. Nameyê Bajarî ser o zî Vedat Yildirim qisey kerd û vat: ''Eke edalet nêro caardene komel do birîndar bibo.'' Hemserekê KESKî Bozgeyîkî îfade kerd ke ê hertim paştî danê keyeyê Şenyaşarî.