Abdulbakî Harmanci qezaya Kanîreşî ya Çewlîgî de serra 2014î de vejîyabi verê mehkeme û bi îdîaya 'endamîya rêxistine' cezaya zîndanî ya 6 serran û 3 mengan dîyabî ci.

Dima ke cezaya ci amebî tesdîqkerdene 25ê nîsana 2021î de Harmanci tepişîyabi û erşawîyabi Zîndanê Mûşî. Wextêkî ra pey zî Harmanci erşawîya Zîndanê Erziromî.

Harmanci de nêweşîyê giranî est ê. Harmanci hînî nêeşkeno bi sereyê xo, hewcedarîyanê xo bîyaro ca.

Lajê ey Ferît Harmanciyî da zanayene ke babîyê ci pê îfadeyê şahîdêkê nimiteyî ameyo tepiştene û vat: ''Babîyê mi, wextek verî bi nêweş û doktoranê Nêweşxaneyê Dewlete yê Mûşî o sewqê Dezgehê Tipê Edlîyî (ATK) yê Îstanbulî kerd. ATKyî babîyê mi muayene nêkerd û raporê 'eşkeno zîndan de bimano' da ci.

Babîyê mi amelîyetê qelbî yo akerde bi, pîzeyê ci de birînê girîngî est ê, çimêkê ci nêvîneno, çepikanê ci de warîs est o, tengnefes o û veng nêşino goşanê ey. Mumkîn nîyo ke merdimo 70 serre zîndan de bimano. Merdimo hende nêweş senî zîndan de tepişîyeno û senî ATKyî raporo winasên dayo ci? Ma wazenê ke wa hepsê keyeyî bêro dayene babîyê mi.''