Dîmenê şuxilnayîşê çekanê kîmyewîyan ê vera gerîlayan hetê xeylêk selahîyetdaran ra bi taybetî hetê Wezîrîya Pawitişê Neteweyî ra ameyî redkerdene. Labelê Wezîrê Pawitişê Neteweyî Hulusî Akarî îfade kerd ke raporê verênî yê serê Garê de înan gazê çimvêşnayîşî şuxilnayo û wina vat: ''Verê şikefteyan de têna gazê çimvêşnayîşî şuxilîyayî. Naye ra ber qet yew çeka kîmyewîye nêşuxilîyaye.''

Serekê Rûmetî yê HDPyî û Endamê Heyetê Şêwirmendî yê ÎE Ertugrul Kurkçuyî ANFyî rê qisey kerd û vist vîrî ke Tirkîya endamêka Peymana Çekanê Kîmyewîyan a.

Kurkçuyî vat: ''derheqê operasyonê Garê de agahîyî dayêne Meclîsî, sûcê xo îtîraf kerd ke înan vera gerîlayan çekê kîmyewîyî şuxilnayê. Nika Wezîrîya Pawitişî îdîa kena ke înan qetî çeka kîmyewîye nêşuxilnaya û kamî na îdîa red kerda pê 'dezenformasyonî' û 'hemkarîya terorî' sûcdar kena. La nê vateyî bi xo raştîye eşkera kenê. Çunke hema na babete nêameye cigêrayene û dîmenê ke weşanîyayê bi xo şik payda kenê ke çekê kîmyewîyî şuxilîyayê. 2011 ra nata îdîayê şuxilnayîşê çekanê kîmyewîyan rojdem de yê. La rixmê ney zî dezgeh û rêxistinan cigêrayîşêk nêkerd.

Goreyê Peymana Çekanê Kîmyewîyan ganî gazê çimvêşnayîşî envanterê artêşa tirke de çin bibo. La Wezîrê Pawitişî bi xo qebul kerd ke înan de no gaz est o. Goreyê Peymana Cenevre zî şuxilnayîşê nê gazî qedexe yo. Coka Konseya Heqanê Merdiman a Neteweyanê Yewbîyayeyan û Komîserîya Berze ya Heqanê Merdiman a NYyî zî na rewşe ra mesuldar ê. Nê dezgehî bê destûrê Tirkîya eşkenê babete ser o cigêrayîşan bikerê.''

Kurkçuyî îfade kerd ke nika seba ke muxalefet xo îqtîdarî ra biqerifno verê ci de îmtîhanêko pîl est o û vat: ''Nê îdîayî giran ê. Îdîa, sûcdarkerdiş û rexneyî est ê. Eke muxalefet wazeno îdareyê Tirkîya destê mîlîtarîstan, nîjadperestan û mezhebperestan ra bigêro ganî îqtîdarî ra cîya vindero. Nika îqtîdar seba ke serê rexneyan bigêro vateyanê 'yewîya welatî, şerefê artêşe' şuxilneno. La şerefê yew artêşe ancax pê caardişê heqanê merdiman beno.''