Federasyonê Elewîyan ê Demokratîkan (FEDA) bi eşkerayîyêke bale ante hêrişanê vera Dêrsimî ser û semedê têkoşînî veng da dêrsimijan.

FEDA vist vîrî ke dewleta tirke mabênê qezayanê Xozat û Pulurî yê Dêrsimî de wextêk o operasyonê îşxalî dayî destpêkerdene û vat: ''7ê hezîrane ra nata warê nêzdîyê dewanê Kakper, Zoxar, Kizil Kîlîse û Çamurekî  dîyenî bombayan ver. Şar terseno û qesawet keno. Nê dewê ke qala înan yena kerdene zafê înan xora verî bibê veng nika newe ra şar agêrayo înan. Dewleta tirke seba ke nê dewan bikero veng, şarî tersnena ke herra xo ya bimbareke caverdo. Coka nê operasyonê leşkerî yenê kerdene.

Hetekî ra bi qirkerdişê kulturkî ziwan, kultur û bawerîya ma hedef genê hetê bînî ra zî bi qirkerdişê fîzîkîyî wazenê Dêrsimî  bikerê xirabe. Muftîyîye û Unîversîteya Dêrsimî  bîyî yew şarê ma rê îslamê îqtîdarî danê ferzkerdene. Coka ma veng danê heme dêrsimijan û dostanê înan, bêrê ma pêro pîya vera qirkerdişê kulturkî têkoşîn bikerê. Hema ke zaf erey nêbîyo wa her kes wayîrê Dêrsimî yo ke mekano bimbarek ê elewîyanê kurdan o bivejîyo.''