Meclîsê Şarê Kurdan ê Gallerî şaristanê Newportî de seba paştdayîşê Rojawanî şewêk serûber kerde. Bi seyan kesê şaristananê cîyayan ê Gallerî ra, Partîya Karkeran û Partîya Plaid Cymru, temsîlkarê rêxistinanê komelkîyan ê demokratîkan û endamê meclîsê şaredarîye tewrê şewe bîyî.

Parlamentera Newportî ya Partîya Karkeran Jessîca Morden meydanê çalakîye de qisey kerd û vat ke ganî hêrişê dewleta tirke yê pakîya etnîke û qirkerdişî yê vera Vakur û Rojhelatê Sûrîye bêrê qedînayene. Mordene vat: "Paştdayîşê ma yê seba kurdan Galler de heman wextî de yeno manaya paştdayîşê ma yê seba Rojawanî û Rojhelatê Mîyanênî."

Parlamenterê Partîya Plaid Cymru yê Parlamentoyê Neteweyî yê Gallerî Bethan Sayedî zî vat, "Şarê Gallerî û partîya neteweyî ya Gallerî Plaid Cymru wextêkê dergî ra nata têkoşînê şarê kurdî û şarê kurdî taqîb kenê û paştî danê înan."

Sayedî vist vîrî ke wextê grevanê vêşanîye vera tecrîdkerdişê Ocalanî de Plaid Cymru vernîyazê persî pêşkêşê Meclîsê Neteweyî yê Gallerî kerd û bi nê hawayî bîye partîya verêne ke bi hawayêkê fermî paşt dana têkoşînê şarê kurdî.

Parlamenterê Partîya Karkeran Jonh Grîffîthsî zî vat ke têkoşînê şarê kurdî têkoşînêko heqdar, meşrû û ercaye yo û ê do her tim paştî bidê kurdan.  Çalakîye hunermend Sîpan Xelat û Kadîr vejîyayî senhe ser. Çalakîye de hetkarîya madîye ke ameye arêdayene  do bêra erşawitene Rojawanî.