27ê Teşrîya Peyêna a 1978î de serkêşîya Rayber Apoyî de Partîya Karkeran a Kurdîstanî (PKK) ronayîşê xo îlan kerd. No bi destpêkerdişê cuyeyêka bi têkoşînî ameye mîrazkerdene. Coka no tarîx sey Roşanê Ganîbîyayîşî yeno zanayene. Seba ke rûhê nê roşanî bêro xurtkerdene gerîlayî des serran ra nata têkoşîn kenê û semedê serkewtişî ganê xo feda kenê.

Gerîlaya YJA Starî Sara Berazî û gerîlayê HPGyî Welat Şerzanî ke serrgêra ronayîşê PKKyî pîroz kerd, ANFyî rê qisey kerd.

Gerîlaya YJA Starî Sara Berazî vat: ''Ewro vera îşxalkeran xoverdayîş bi rûhê ronayîşê PKKyî dewam keno. PKKyî çew nêeşkeno bi çend vateyan tarîf bikero. Îşxalkerî nêeşkenê xoverdayîşî bişiknê. Ewro têkoşînê ma heme dinya yeno wayîrvejîyayene.  Ma sey şervananê YJA Starî bi fîkranê Rayber Apoyî rayra şinê û bi hêzê fîkranê ey têkoşîn kenê. Xoverdayîşê ma do heta azadkerdişê Kurdîstanî û Rayber Apoyî dewam bikero.''

Gerîlayê HPGyî Welat Şerzanî vist vîrî ke ronayîşê têkoşînî ra nata dewleta tirke tim vana ê do mîyanê çend rojan de PKKyî biqedînê û vat: ''PKKyî 46 serrî xo dima verdayî. Çalakîya fedaîye ya şehîd Asya Ali û Rojger Hêlinî ya Anqara mojna ke gerîlayî eşkenê cayanê biasayîşan ê dewleta tirke de çalakîye bikerî. Dewleta tirke bi serran o derbanê giranan wena. Rîyê xoverdayîşê gerîlayan û şarê kurdî ra mecbûr mend ke beranê Îmraliyî abikero. Ma do serra newî de xoverdayîşê xo xurtêr bikerê û dişmenî herra xo ra vejê.''