Vera destsernayîşê Şaredarîya Mêrdînî, Êlihî û Xalfetî xoverdayîş dewam keno. Hemserekê Komeleya Heqanê Merdiman (ÎHD) Huseyîn Kuçukbalabano ke hîrê şaredarîyanê destsernayeyan de cigêrayîşî kerdî, derheqê babete de ANFyî rê qisey kerd.

Kuçukbalabanî îfade kerd ke 5-7ê teşrîna peyêne de o şîyo hîrê şaristanan û vat: ''Şarê herême vera qeyûm razî nîyo û bi çalakîyanê haştîyaneyan nêrazîbîyayîşê xo mojneno. La mi dî ke hêzanê asayîşî bi hêzêkê zêdeyî mîyanê kuçeyan de îşkence kerdo. Bi taybetî Êlih de teda û îşkenceyî est ê. Mêrdîn, Êlih û Xalfetî de bînayê şaredarîyan binê ablûqa de yê. Her ca de tîmê polîsî û cendermeyî cakerde yê  ke şarî bitersnê.

Êlih de 70ê ci domanî 250 kesî ameyî destbendkerdene, 10ê ci domanî 25 kesî tepişîyayî. Mêrdîn de 7ê ci domanî 15 kesî ameyî destbendkerdene û  2 kesî tepişîyayî.''

Kuçukbalabanî da zanayene ke serebûtê ke qewimîyenê prosesê peyênî ra cîya nîyê û vat: ''Hetêkî ra venga Abdullah Ocalanî dîyeno, hetê bînî ra zî Xalfetî de namzedê ke bi raydayîşê şarî ameyê weçînayene erkî ra dûrî visîyayê. Her çî ra ver dewlete û hukmatî qebul kerdo ke aktorê meseleya kurdan o tewr girîng Abdullah Ocalan o. Şarê kurdî ney ra aciz bîyo ke meseleya kurdan sey hacetêkê polîtîkî şuxilîyena. Ganî rêxistinê komelê sivîlî, rayaumûmîya demokratîke, roşnvîr, nuştox û çapemenîye bi rolêkê aktîfî têbigêrê, ganî na babete de gamê çêrî bierzîyê.''

Kuçukbalabanî pare kerd ke polîtîkaya qeyûman verê haştî û çareserîye qefilneno û heta ke meseleya kurdan çareser nêba çew nêeşkeno haştîye ra qisey bikero. Kuçukbalabanî vat: ''Ganî seba wedarîyayîşê tecrîdî gamê musbetî bierzîyê û o bieşko keye û avûkatanê xo bivîno.''