Wekîla HDPyî ya Îstanbulî û Endama Komîsyonê Edaletî yê Meclîsî Zuleyha Gulum derheqê sîstemê tecrîdî, zîndananê bi asayîşê pîlî û merganê şikdaran ê zîndanan de ANFyî rê qisey kerd.

Zuleyha Gulum bale ante ser ke zîndananê bi Tîpê Fyî de tepişteyan rê rejîmê înfazî yê dişmenî yeno kerdene û vat: ''Nê zîndanan de tecrîdêko sîstematîk est o û tênaverdayîşê tepişteyan yeno armanckerdene. Reyna tepişteyî keyeyanê xo ra dûrî rê yenê surgunkerdene ke no zî parçeyêkê tecrîdî yo. Şertê xiraban ê nê zîndanan zî tepişteyan de benê sebebê nêweşîyan. Tîpê Fyî xora zîndananê bi asayîşê berzî ra yew o. Nê zîndanî bi destê AKP-MHPyî de bîyî. Tepişteyê sîyasîyî zîndananê winasênan de tepişîyenê.

Îqtîdarî bi taybetî wextê janî de qanûnê taybetî vetî û zîndanî kerdî warê caardişê huqûqê dişmenî. Zîndanan de tepişteyan rê cezaya dîsîplînî ya keyfîye, qedexeyê aktîvîteyan, qedexeyê têkilîye, qedexeyê zîyaretkerdan û cezaya hucreyî dîyenê. Yanî tepişteyan rê mîyanê ceza de ceza yena ferzkerdene. Tepişteyê sîyasîyî bi bahaneyan yenê qirkerdene.

Cenazayê ke zîndanan ra vejîyenê, zêdîyayî. Îqtîdar Dezgehê Tipê Edlîyî (ATK) sey hacetê qesasî şuxilneno û pê raporanê ATKyî tepişteyanê nêweşan terkê mergî keno. Ganî şertê zîndanan bêrê weşkerdene, polîtîkayê qedexe û tecrîdî biqedê û faîlê kerdişanê xiraban bêrê cezakerdene. Ganî destê ATKyî ra cade înîsîyatîf bêro girewtene û tepişteyê nêweşî bêrê weşkerdene. Her mergê zîndanan ra Wezîrîya Edaletî, îqtîdar û îdareyê zîndanan mesuldar ê.''