Vervatoxa HDPyî Ebru Gunay merkezê partîya xo de kombîyayîşê çapemenîye kerd û babetê rojdemî ercnayî.

Qiseykerdişê Gunaye ra tay noqtayî wina yê:

''Îqtîdarê AKP-MHPyî arîfatê Roşanê Remezanî de zî hêrişê erdê Herêma Kurdîstanî keno. Netîceya nê şerî de her roje merdimî mirenê, cenazayî yenê. La îqtîdar têna armanc keno ke emrê xo derg bikero.  No şer, şerê Tirkîya nê şerê îqtîdarê AKP-MHPyî yo ke seba dergkerdişê emrê îqtîdarî û dişmenîya kurdan yeno kerdene. Seba ameyoxî ganî nê hêriş û şerî bêrê vindarnayene. Îqtîdar key vera cayêkî operasyonê leşkerî bikero, vera partîya ma zî operasyonan keno. Hewteyê vîyarteyî de çarçewa Dewaya Kobanê de 48 kesî ameyî destbendkerdene. Pawitişê HDPyî pawitişê demokrasî yo.

Îqtîdarê AKPyî pê pêro hêzê xo hêrişê destkewteyanê şarê kurdî keno. Êyê ke şerê Rûsya-Ukrayna de dîplomasîya sexte kenê, vera kurdan şer kenê. No seba pêro merdimîye tehlukeyêko pîl o. Têna şirîkê îqtîdarî polîtîkayanê şerî yê îqtîdarî ra fayde vînenê. Bêguman rojêke şarê Rojhelatê Mîyanênî sey vizêrî ewro zî rayîr nêdê polîtîkayanê şerî. Şarê Tirkîya do ameyoxê xo yê demokratîkî qetî bipawê.''