Hasbî Çakiciyo ke seba wedarîyayîşê tecrîdê Îmraliyî yê vera Rayberê Şarê Kurdî Abdullah Ocalanî 127 rojan grevê vêşanîye kerdbi, şaristanê Den Haagî yê Hollanda de nêweşîya helîyayîşê esteyan ra roja îneyî dinyaya xo bedilnaye.

Seba Çakiciyî Merkezê Komelê Kurdan ê Demokratîkî yê Den Haagî de serweşîye yena waştene.

Çakiciyî 2ê gulana 2019î de ajansê ma rê qisey kerdbi û wina vatbi:

Ti eşkenî sere ra xo bide naskerdene?

Nameyê mi Hasbî Çakici yo, Êlîhê ra ya. Ma 3 way û 4 bira yê. Pîyê mi karmendê dewlete bi. No semed ra ma Kurdistan û Tirkîya de xeylî bajaran ra gêrayî. Mi wendegeho verên Elîh de, mîyanên Nîsêbîn de, lîse zî Antalya de wende.  Unîversîteya Teknîkî ya Rojakewtena Mîyanêne (ODTU) mi muhendisîya înşaatî de sinifa 2’ine de teriknaye.

Ti têkoşînê azadîye yê Kurdan senî nas kerd?

O wext atmosferêkê xurt ê sîyasî estbi, her kes tewrê rêxistinêk bîyêne. Mi zî hevalê Egîd (Mahsûn Korkmaz) nas kerd û bado tewrê mîyanê têkoşînê azadîye yê Kurdan bîya. Dimayo ke ez wextêk hevalê Egîdî reyde menda, mi dest bi xabetê aktîfî kerd. Bado Mîdyat, Nisêbîn, Êlîh û Qoser de xebitîya. 3'ê Temmuze 1979 de Qoser de amaya girewtene. Ez berda Hepsixaneyê Mêrdînî. Hezîrane 1983 de bi şert ameya verdayene. Bado mi xebatê xo Mersîn û Antalya de dewam kerd.

Ti key ameyî bi Ewropa?

Teşrîna Peyêne 1991 de ez ameya Ewropa. Bajarê Den Haagî yê Hollanda de ca bîya. Tîya de mi dest bi xebatê kulturî yê Merkezê Cimatê Demokratîkî yê Kurdan kerd. Mabênê serranê 1996-97 de tewrê mîyanê karê KNK’yî bîya. Bado agêraya xebatanê Merkezê Cimatê Demokratîkî yê Kurdan ê Den Haagî.

Ti senî qerar da û dest bi çalakîya grevê vêşanîye kerd?

Dimayo ke hevala Leyla Guvene dest pêkerd, wextêko derg ez ser o fikirîya. Ez xo ra persaya û mi vat, ez do senî bieşkaya cewab bida prosesî. Nê bingeyî ser o mi qerar da û tewrê çalakîye bîya. Tewr peynîye de ez silamanê xo Leyla Guvene û heme hevalê ke xo ver ro danê rê şawena.