DEM Partî 22yê sibate de Îstanbul de îdareyê xo yo newe weçîna. Arîfe Çinar û Çinar Altan bîyî Hemserekê DEM Partî yê Îstanbulî. Hemserekanê neweyan ajansê ma rê qisey kerd.

Çinar Altanî bale ante vengdayîşê ‘Haştîye û Komelê Demokratîkî’ yê Rayber Apoyî ser û pare kerd ke ê do mabênê 9ê adare û 15ê adare de bi kombîyayîşanê şarî qalê prosesî şarî rê bikerê. Altanî vat: ‘’Ma hîrê herêman de 9 kombîyayîşanê şarî do bikerê. Erkê ma yo ke ma şaran reyde nîqaş bikerê û mesajan biresnê înan. Haştîya rûmetêne hesreta her kesî ya. Ma wazenê bibê serkêşê ney. Newroze zî do seba wayîrvejîyayîşê vengdayîşî biba beyanê îradeyî. Ma do bingeyê tewrbîyayîşê nê vengdayîşî de xo rêxistin bikerê. Tena kurdî ney ganî pêro beşê komelî tewrê Newroze bibê.’’

Arîfe Çinar zî bale ante talankerdişê keda cinîyan ser û vat: ‘’Ver bi 8ê Adare rojdemkerdişê haştîye girîng o. Bi rayîrê meclîsanê ma yê cinîyan ma do kombîyayîşanê haştîye bikerê. Ancî ma do vera werdişê keda cinîyan zî xebatan bikerê. Ma do her ca de temsîlîya têdûşte vila bikerê û têkoşînê xo rê dewam bikerê.

Ma do 23yê adare de Îstanbul de Newroze fîraz bikerê. Seba cuya têdûşte û azade ma do wayîrê prosesî vejîyê. Awankerdişê komelê demokratîkî erkê ma pêroyînan o.’’