Heyetê Rayraberdişî yê Merkezê Partîya Demokratîke ya Şaran (HDP) ewro eşkerayîyêka nuştekîye daye û vat tîfaqê Torosanê Sipîyan reyna serê karî de yo.

Eşkerayîye de  bale ameye antene serê ke wekîlê înan Murat Sarisaç çend rojî yo hetê erebeyêkê bêplaka û şexsanê şikdaran ra ameyo teqîpkerdene û nê ameyî parekerdene:  ''Wekîle ma vizêr cemê şanî verê bêrê xo de  nê şexsan persa ke ê qey ey teqîp kenê û dîmenê erebeyî qeyd kerd. Nê şesxanê şikdaranê ke verî rîyê xo girewt, dest û lingê înan kewtî têmîyan  û nêzana se bikerî dima ra seba ke talîmat girewt bi  tewirêkê korsankî verê erebeyê wekîlê ma girewt û endamê Meclîsê Partîya ma Yunus Durdu remna. Nê şexsanê ke bi psîkolojîya sûcdarîye tê gêrayene ajanso fermî yê dewlete Ajansê Anadolu (AA) zî sey hecetê xo şuxulna. AA remnayîşê endamê ma Duruyî yo ke xebatê kongreya ma rayra berdene û teqîpkerdişê wekîlê ma bi xebera sernameyê 'wesayîtê wekîlî ra terorîst vejîya'  da ke HDPyî sey hedef ramojno û sûcê hêzanê tarîyan meşro bikero. Îqtîdarê AKPyî  bi tewiranê winayênan ê demê tarîyî  yê seranê 90an wazeno ke şarê kurdî bi  Torosanê Sipîyan tehdît bikero. La ma vera nê tehdîtanê tarîyan ê îqtîdarî de çok nêdanê. Ê ke Tansu Çîler û Mehmet Agarî rê paşta xo giredanê do reyna vîn bikerê.''