Konferansê herême yê HDPyî yê ke bi şîarê ''Xoverdayîşo pîl, rayraşîyayîşo pîl'' ameyî kerdene bi konferansanê Amed û herêma Çukurova qedîyayî. Konferansê herêma Amedî bi nameyê ''Meseleya kurdî û çareserî'' rîyê hêrişê polîsan ra  teber de ame kerdene.

Wekîlê HDPyî Tayyîp Temel, Ayşe Acar Başaran, Ebru Gunay, Ayşe Surucu, Dersime Dag, vervatoxê herême, hermserekê Amedî û bi seyan kesî tewrê konferansî bîyî. Polîsan heyeta konferansî girewte binê ablûqa û hêrişê şarî kerd. Wekîlê Şirnexî Huseyîn Kaçmaz hêrişê polîsan de birîndar bi. Rîyê hêrişê polîsan ra konferans teber de ame kerdene.

Hemserekê HDPyî yê Amedî Zeyat Ceylanî ke qiseykerdişê akerdişî kerd ard ziwan ke polîsî bi talîmatê îqtîdarî kenê ke konferasnî asteng bikerê û vat la ê se kenê wa bikerê qet yew hêz nêeşkenê verê înan bigêro.

Hetkarê Hemserekanê HDPyî Tayyîp Temelî zî bale ante rewşa welatî ser û vat: ''Hetêkî ra şer, pêkewtiş, zext û hêrişî est ê, hetê bînî ra têkoşîn û xoverdayîşo xurt  yeno dayene. Hetêkî ra hesabê wirdîyî yê sey hemkarîye û îxanetî yenê kerdene, hetê bînî ra semedê wayîrvejîyayîşê ercanê welatperwerîye bedelê pîlî yenê dayene. Yeno waştene ke kurdî yewna seserre bêstatu bimanê la vera nê têkoşîno xurt yenokerdene. Ma mîyanê yew têkoşînî de yê ke wazeno koletîye biqedîno û kurdan bikero wayîrê statuyî. Çim û goşê şar û dostanê ma ho ma ser. ''

Temelî vat: ''Amed bajarê xoverdayîş û anorî yo. Kenê ke nê nasnameyê Amedî çîn bikerê. Têna partîya ma nê, nasnameyê kurdan yeno hedefgirewtene. Dişmenîye kurdan kenê, hêrişê ziwan û nasnameyê ma kenê.  Qeyûman tewr verî tabeleyê kurdkî ardî war û herişê heme ercanê kurdan kerd. Nika zî konserê kurdkî yenê qedexekerdene. Seba ke ma hesabanê înan xeripnenê, ma ra hêrsbîyaye yê. Kurdî bi xoverdayîşê xo bîyî hêvîya şaranê dinya. Bi tecrîdî wazenê ke îradeyê şarê kurdî bişikinê.

Tecrîdê serê Birêz Ocalanî tecrîdê vera îradeyê çareserî yo. Birêz Ocalan 40 serrî yo gêreno muxatabêkî. Îqtîarê AKP-MHPyî têna muxatabê şerî yo. Ma Amedî ra reyna veng danê. Waştişê kurdan eşkera yê. Şarê ma teberê ameyoxê azadî û cuya bianore de qet çîyêkî bînî qebul nêkeno.  Şarê ma azadîya ziwan û nasnameyê xo wazeno. Ma şerî nêwazenê.  Adersê çaresî bewlî yo. Muxatabê çareserî Birêz Ocalan o.

Aktorê sîyasîyî yê ke hesabê sibayî kenê, eke şima paştîdayîşê kurdan wazenê, tewirê xo yê vera waştişanê kurdan zelal bikerê. Êyê ke Birêz Ocalanî nêsarisnenê û hetê şerî de yê kurdî paştî nînan nêdanê. Şarê ma Newroze û 8ê Adare de reyna ramojna ke waştişê xo canêverdayî.No tewirê şarê ma berpirsîyarîya ma pîlêr keno û eynî wextî de semedê ameyoxî hêvî dano ma. Şarê ma amede yo, ma pê xo bawer kenê. Ma do problemanê xo çareser bikerê. Ma sey têkoşêranê azadîye her ca de bedel danê, no têkoşîn do ser bikewo.''

 Wekîla HDPyî ya Amedî Dersim Dage zî ard ziwan ke  şarê kurdî  û HDP do çirey vera zextan de milê xo çewt nêkerê û vat ê her ca de bi têkoşînî cewab bidê faşîzmî.

Hemserekê Pêroyî yê KCDyî Berdan Ozturk zî ard ziwan ke seba ke tersê faşîzmî bîyo pîl, wazenê konferasnî asteng bikerê û vat kurdî do sey tim bi xoverdayîşî wayîrê ercanê xo vejîyê.

Vervatoxa HDPyî Ebru Gunay zî vist vîrî ke heme problemê welatî pabesteyê tecrîdê Îmraliyî yê û vat Ocalan temînatê haştîye yê walatî yo.

Vervatoxa Meclîsê Cinîyan Ayşe Acar Başaran zî bale ante dişmenîya dewleta tirke ya vera kurdan ser û vat bado ke pêvînayîşê bi Birêz Ocalanî vindarnayî kurdî her hetî ra raştê hêrişanê giranêran yenê la ê nêeşkenê verê têkoşînê heqdarî bigêrê.

Konferanê Herêma Çukurova zî bi tewrbîyayîşê wekîlan Tulay Hatimogullari û Mehfuz Guleryuz, temsîlkaranê Meclîsê Ciwanîye, îdarekarî Bedia Akkaya, Feraye Mertoglu, hemseraknê partîye yê Mersinî û xeylêk kesan ame kerdene.