Qezaya Amasra ya Bartinî de warê qirkerdişê madenî de cigêrayîşî dewam kenê. Vizêr pîya bi HDPyî xeylêk sîyasetmedar û rêxistinanê huqûqî warê qirkerdişî zîyaret kerd.

Heyetê HDPyî ke saetanê şanî de resa warê qirkerdişî tîya cigêrayîşî kerdî. Hetkarê Hemserekanê HDPyî Ridvan Turanî ke dîya derheqê qirkerdişî ercnayîşî kerdî vat zaf kêmayî û xeletî est ê.

Turanî vat:  ''Eke asayîşê weşîye yê karî yo bingeyênî biameyêne girewtene do ganê ma wina zaf meveşayêne. Keye bêewlad, domanî bêbabî û cinîyêî bêcamêrd nêmendêne. Ça de qala fitrat û qederî yena şuxulnayene ûca de zaf çî yeno nimitene. Tîya bipaykerdişê asayîşê weşîye karî est o.  Eke tedbîrê ke hewcê kenê merê girewtene, perwerdeyo qîmkerde mero dayene û karkerê bêtecrube bêrê xebitnayene netîceya ci de qeza zî bena. Soma de zî nê çî qewimîyaybî. Eke goreyê zanîstî û teknolojî mero têgêrayene xora wina beno.''

Turanî bale ante şuxulnayîşê çekuya ''qeder''î yê  Serekkomar Erdoganî ser û vat: ''wezîfeyê Serekkomarî vera gonî peredayîş nê, astengkerdişê qezayan o. Wextê îqtîdarê Erdoganî de bi desan karkeran dinyaya xo bedilnaye. Berpirsîyarê nê îdarekarê nê walatî yê.''