Komîsyonê Bawerî û Şaranê HDPyî bi eşkerayîyêke serrgêra 107. de  qurbanê Qirkerdişê Sayfoyî yad kerdî

Eşkerayîye de ame vîrvistene ke Qirkerdişê Sayfoyî de beşo pîl ê nufusê sûryanîyan ame qirkerdene û ewro zî sûryanîyan rê tedayî dewam kenê. Eşkerayîye de ame vatene ke dewleta tirke bi hişmendîya 'tirkkerdiş û misilmankerdişê cografya' sûryanîyî asîmîle û qir kerdî, dayî koçkerdene, dest nîya mal û mulkanê sûryanîyan ser û dezgehê sûryanîyan ameyî qefilnayene.

Eşkerayîye de wina ame vatene: ''Ewro hema zî heqê şarê sûryanîyan yenê binpaykerdene, destûrê akerdişî nêdîyeno îbadetxane û dibistananê înan, dest nîyeno weqf û malanê înan. Sûryanîyê ke serran ra dima agêrayê dewanê xo, raştê gefanê kiştiş û tedayan yenê. Ganî şarê sûryanîyan ra uzr bêro waştene, hemwelatîya têdûşte bêra dayene sûryanîyan û Qirkerdişê Sayfoyî de bêro şinasnayene.''