Meclîsê HDPyî 27-28ê nîsane de bi hawayêkê onlineyî kombîyayîşê xo kerd. Kombîyayîşo ke 1ê Gulane Roja Karkeran ra verî ame kerdene dîyarîya karkeran, kedkaran û bindestan ame kerdene. Netîceyê kombîyayîşî zî pê eşkerayîyêke ameyî parekerdene. Beyanname de ame parekerdene ke krîzê pandemî, tedayê peyênî, hêrişê vera goristanan, rojeyê mergî, şîdetê vera cinîyan, hêrişê vera Mexmûrî, têkoşînê karkeran û meseleyê înan ameyî ercnayene.

Eşkerayîye de ame vatene ke AKP hînî nêeşkeno welat îdare bikero û prosesê janî xo rê sey firsend vîneno. Eşkerayîye wina dewam kena: ''Kedkar û bindestî prosesêk winasênî de yê ke seba nînan hem firsend hem zî rîskê pîlî estê. HDP nê prsesî de zî nînan reyde têkoşînê xo dewam bikerê.''

Eşkerayîye de seba tecrîdê vera Rayberê Şarê Kurdî Abdullah Ocalanî zî nê çîyî ameyî vatene:

''Rixmê vengdayîşanê haştîye zî hema zî tecrîdêko giran yeno kerdene ke no nêno qebulkerdene. Nê prosesê janî de ganî îqtîdar bi hawayêkê nîzamî rayaumûmîye rê rewşa weşîye ya Birêz Ocalanî eşkera bikero. Ganî bi hawayêkê lezî tecrîdo girankerde bêro qedînayene, vera vîrusê Korona tedbîr bêro girewtene û avûkat û keyeyê ganî bieşko Birêz Ocalan reyde pêvînayîş bikerê. Her wextî ra zêdêrî hewceyê şaranê Tirkîya û Rojhelatê Mîyanênî pê Birêz Ocalanî esto. Coka seba ke Birêz Ocalan bieşko rolê xo yê tarîxî yê seba awankerdişê haştîya komelkîye bîyaro ca ganî şert û mercê hewcedarî bêrê amadekerdene. Nê esasî ser o şert û mercê azad û asayîşî seba Ocalanî bêrê afernayene.''

Eşkerayîye de hêrişkerîya dewleta tirke ameye ercnayene û wina ame vatene: ''Hêrişê vera şarê kurdî dewam kenê. Dewamkerdişê nê hêrişan, hêrişê vera Mexmûrî mojnenê ke yewîya neteweyî ya demokratîke senî hewce ya. Ma sey HDP venga terefan danê ke pê berpirsîyarîye têbigêrê û xo gamanê ke do bibê semedê alozîya herême ra dûr bigêrê. Seba yewîya neteweyîye ya kurdan gamanê bitesîran berzê.''