Hetkarê Hemserekîya Pêroyî ya Komîsyonê Kede û Polîtîkayanê Komelkîyan ê HDPyî Şazîye Kose bi wesîleya 17ê Teşrîna Verêne Roja Têkoşînê vera Xizanîye ya Dinya eşkerayîyêka nuştekîye weşanaye.

Eşkerayîye de ame parekerdene ke dinya de nêzdîyê 2,5 mîlyar merdimî binê sînorê xizanîye û vêşanîye de yê. Şazîye Kose da zanayene ke tarîxê Tirkîya de verî vêşanî, xizanî û bêedaletîye hende zaf nêbîya û polîtîkayanê AKP-MHPyî ra vêşanîye her ke şina bena zêdeyêr.

Kose vat: ''Îqtîdar çimeyanê şarî dano sermay, terefgir, rantan. Îqtîdar na feqîrîye zî sey serebûtanê bînan sey 'qederî' şarî rê ferz  keno. Nê vîst serran de AKPyî xizanîye, feqîrîye, zulm, zorbazîye û îstîsmarî ra ber çîyêk nêdayo nê welatî. Ê qesra xo de ronişenê û goş nêdanê şarî ser. Bi berzkerdişê vengê feqîran û berzkerdişê îtîrazanê înan peynî de do sîstemê înan birijîyo. Ma do bi hîrakerdişê îtîfaqê azadîye û kede soz danê ke têkoşînê xo yê seba şawitişê nê îqtîdarî pîlêr bikerê.''