Nasrullah Kurano ke 15ê adara 2015î ra heta 29ê kanûnê 2015î sey sekreteryaya Rayber Apoyî Îmrali de bi û dima ame surgunkerdene derheqê vengdayîşê Rayber Apoyî de ANFyî rê tayê ercnayîşî kerdî. Kuran nika Zîndanê Sîlîvrî de tepişîyeno.

Kuranî ercnayîşanê xo de bi kilmî nînan ser o vindeno:

‘’Vengdayîşê Haştîye û Komelê Demokratîkî yê Rayber Apoyî hem bi eleqeyêkê pîlî hem zî bi matmendişî ame pêşwazîkerdene. Pêşnîyazê feshkerdişê PKKyî surprîzêk viraşt.

Ganî merdim metnê vengdayîşî bi temamî biwano û fam bikero. Heyf ke medyaya tirkan de ‘verdayîşê çekdan’ û ‘feshkerdişê PKKyî’ vejîyenê vernî û şertê seba nê wird netîceyan zî çin hesibîyenê.

Rayber Apoyî vengdayîşê xo de 7 madeyî rêz kerdî ke nînan dîyar kerd ke o amade  yo ke mesuldarîye bigêro xo ser. Vengdayîşê Rayber Apoyî zelal o û  cigêrayîşê cuya hempare ya haştîyane û demokratîke de seba dewleta tirke, rêxistina PKKyî û şaranê Tirkîya ame kerdene.

Rayber Apoyî seba komara demokratîke venga dewlete da. Zemînê awankerdişê komara demokratîke de îtîfaqê kurdan û tirkan temam bikerê! Yanî pêşnîyazê feshkerdişê PKKyî pabesteyê şertê komelê demokratîkî, sîyasetê demokratîkî û asayîşî yê huqûqî yo.

Pêşnîyazê feshkerdişê PKKyî seba Rayber Apoyî asan nêbîyo. Dewletêke bifikirê ke sîyasetê xo ra heta ekonomî, sîstemê edaletî, perwerde û her çî bingeyê antî-kurdayetîye-PKKyî de û bi kodê ‘terorî’ şifre kerdo. Vengdayîşê Rayber Apoyî esasê xo de vera nê çerxî mudaxeleyêk bi.

Merdim eşkeno vajo ke ‘madem wina yo, qey Rayber Apoyî verê cû no vengdayîş nêkerdo?’ Prosesê 2015î nê esasî ser o aver şibi la hem şerê zereyî yê dewlete hem zî tersê ‘vurîyayîşanê herême’ ra apey şi û bi ‘planê rijîyayîşî û tecrîdê mutleqî’ qedîya. Nika zî qewimîyayîşê sey Şerê Dinya yê Yewinî est ê. Safhaya nikayêne de di tercîhî verê kurdan û tirkan de est ê. Bahçelîyî zî qiseykerdişê xo yê Meclîsî de îtîfaqê kurdan û tirkan tercîh kerd û seba ney venga Rayber Apoyî da. Rayber Apoyî zî bi zanayîş û exlaqî mesuldarîya tarîxîye arde ca û bira caardişê îtîfaqê kurdan û tirkan daye.

Ganî bizanîyo ke na hemleya ke hetê Rayber Apoyî ra ameya averberdene îmkanê têkoşînê hemparî dana şaranê Tirkîya û Kurdîstanî. Na çarçewe de ganî her kes wayîrê Vengdayîşê ‘Haştîye û Komelê Demokratîkî’ vejîyo û seba pratîkkerdişê ney xîret bikero.

Ma israrê xo yê seba azadîye, têdûştîye û welatê demokratîkî rê dewam kenê, bi nê coş û qerardarî ma venga kurd, tirk, ereb, laz, çerkez, sûryanî û şaranê bînan danê ke 8ê Adare û Newroze de meydanan debikerê.