Dima ke Komara Tirkîya ronîyaye 25ê kanûna 1935î de derheqê eyaletê Dêrsimî de dewlete raporêk amade kerdbi û bi nê hawayî prosesê Terteleyê Dêrsimî dest pêkerdbi. 4ê gulana 1937î de zî bi fermanêkî qirkerdiş dest pêkerd.

Hemserekê HDPyî yê Dêrsimî Ferhat Yildizî derheqê babete de PÎRHA rê qisey kerd. Yildizî îfade krd ke 4ê Gulane netîceya planê têgêrayîşê qirkerdişî bi û vat: ''4ê gulane ra verî zî, wextê Osmanîyan de û wextê Komare de tim 'înşaya dewlete' ser o bernameyêk est bi. Seba ke dewleta neteweyî ya tirkan bêra awankerdene, ame waştene ke pêro neteweyê bînî bêrê çinkerdene. Qirkerdişê Armenîyan, Pontus-Rum, Koçgirî û Dêrsimî nê armancî ser o ameyî kerdene. Serrê 1937-38î noqtaya peyêne ya Terteleyê Dêrsimî bîyî.

Dêrsimî destpêkî ra nata xo îdare kerdêne. 4ê Gulane ra verî pêro çekî ameyî arêdayene, planê têgêrayîşî ame amadekerdene û seba tarûmarkerdişê Dêrsimî têgêrayî dest pêkerd. Armancê Terteleyê Dêrsimî no bi ke wa kurdî bibê tirk û elewîyî bibê sunî.

Ma wazenê wa dewlete nê qirkerdişî qebul bikera, şarê Dêrsimî ra uzrê xo biwaza û cayê goranê Seyîd Riza û 6 embazanê ci eşkera bikera.''