Heyetê Îmraliyî yê hewt kesan vizêr Rayber Apoyî reyde pêvînayîş kerd û dima ra vengdayîşo tarîxî yê Abdullah Ocalanî rayrapêroyîye rê eşkera kerd. Badê eşkerayîye ke her hetî de bîye rojdem, notê peyênî bale ante xo ser. Endamê Îmraliyî yê DEM Partî Sirri Sureyya Onder bi vatişê ''Îmraliyî ra noto peyên'' cumleyêke pare kerde û bale ante berpirsîyarîya dewlete ser. Sirri Sureyya Onderî  bi vatişê Rayber Apoyî, '' Gama ke ma nê perspektîfî eşkera kenê, bêşik pratîk de semedê ronayîşê çekan û xo feskerdişê PKKyî, ganî sîyaseto demokratîk û hetê ci yo huqûqî bêro naskerdene'' pare kerd.

Xususo ke vizêrna  tewr zaf yeno meraqkerdene o yo ke no metno tarîxîyo ke Abdullah Ocalanî bi yaziyê destê xo nuşt, qey no paragraf tede çîn o.

Goreyê xebera Ajansê Mezopotamya (MA) Îmrali de xeylê detayî ameyî ciwîyayêne ke înan ra yew zî no paragraf bi.

Rayber Apoyî ke Îmrali de no paragraf heyetî reyde pare kerd vat no metn 25ê sibate de ame nuştene la badê pêvînayîşanê bi selahîyetdaranê dewlete qerar ame girewtene ke no paragraf do eşkerayîye de ca bigîro. Ame musayene ke seba ke paragraf rîyê proseduran ra kewto erey metn de ca nêgirewt.

Ame vatene ke Rayber Apoyî nê zanayîşî heyetî reyde pare kerdî û vat eşkerayîye de nê paragrafî zî biwanê.

Dima ra Abdullah Ocalan û heyet  Îmrali de vejîyayî verê hîrê kamerayan. Vengdayîşê tarîxî de Rayber Apo bi nê paragrafî vengdayîş xo qedîna.

Abdullah Ocalanî badê mesajê bidîmenî reyna vat no paragraf dewamê vengdayîşî yo.

Rayber Apo eynî wextî de waşt no paragraf wa salonê eşkerayîye de miheqeq bêro wendene.

Wina qeyde no paragrafo ke selahîyetdarîya dewlete de nîşan dano, bi notê Sirri Sureyya Onderî rayrapêroyîye rê ame parekerdene.