Îqtîdarê AKP û MHPyî destur nêdano ke hetkarî bireso şarê nêçarî ke rîyê Korona ra keyeyanê xo ra nêvejîyeno û dewlete ci rê hetkarîye nêkena. Hetê bînî ra hûmara nêweşan û kesê ke rîyê janê Korona ra mirenê yena nimtene.

Kampanyaya hetkarî ya HDPyî yena astengkerdene

Kampanyaya Keyeyê Wayûbirayî ya HDPyî çend şina vila bena. Keyeyê ke tengayî de yê înan rê hetkarî yena kerdene. La hukmatê tirkî destur nêdano ke na hetkarîyê bireso şarî. Kesê ke xebatê hetkarî kenê hetê hukmatî ra yenê destbendkerdene. Parlamentera HDPyî ya Îstanbulî Huda Kaya ard ziwan ke semedê cuyeyêka bianore hetkarîye zaf gîring a û vat:'' hukmatê AKPyî seba ke şaredarîyî vîn kerdî bi waştişê qesasî têgêreno. Ça de xizmet û hole vîneno hêrişê înan keno la vergirewtişê hetkarî ya nê prosesê janî xîyanetê înan o tewr gird o.''

Tepişteyê sîyasîyî mergî rê ameyî caverdayene

Koordînaysonê Krizî yê Herême yê Covid-19î zî bale ante ser ke zîndanan de rîyê janê Korona ra rîsk beno gird û vat: ''îqtîdarî paştgêrê xo yê tecewuzker û çeteyî veradayî û tepişteyê sîyasîyî mergî rê caverdayî. Eke zîndanan de jan bo do nêro kontrolkerdene. Ganî cade nê tepişteyî bêrê veradayene. Wa şar zî semedê tepişteyanê sîyasîyan hîsgêr tê bigêro. Parlamentera HDPyî ya Adana Tulay Haitmogullari zî meclîs de ard rojem de Zîndanê Rîze de 26 tepişteyan de rixmo ke semptomê vîrusê Korona estî sewqê nêweşxaneyî nêbîyî.''

Doneyê Korona yenê nimitene

Dr. Erdînç Şahînî çend rojî verê ci Mersîn de rîyê vîrusê Korona ra dinayaya xo bedilnayene. Konseyê Merkezê  Yewîya Tabîban ê Tirkî (TTB) derheqê mergê Şahînî de eşkerayîyêke daye û vat raporê mergê ci de yeno vatone ke 'nêweşîya janî-mergo tebîî' û Wezîrîye Weşîye ra pers kerd ke qey înan  raşt nênişto.