Komîsyonê Bawerî û Şaran ê HDPyî  kampanyaya ''Îslam de Kede, Haştîye û Edalet'' daye destpêkerdene. Têhetameyîşo ke Merkezê Tîcaretî yê Dinya de me kerdene  pîya bi Hemserekê Pêroyî yê HDPyî Mîthat Sancarî, Hemvervatoxa Komîsyonê Bawerî û Şaran Tulaye Hatimogullari, Hemvervatoxa Masaya Îsalîmî ya Komîsyonî Diba Keskîn û xeylêk kesî tewrê ci bîyî.

Qiseykerdişê akerdişî hetê Nesimî Adayî ra ame kerdene û dima ra dîwan ame vîjnayene. Tulay Hatimogullari qiseykerdişê xo erebkî kerd. Hatimogullari ard ziwan ke îqtîdar ercanê îslamî şuxulneno û vat Masaya Îslamî vera nê kewt rayîr.

Metnê kampanya yo ke kurdkî û tirkî ame wendene ra tay cayî wina yê: ''Partîya ma HDP wazena ke zextê vera heme bawerîyan bêrê vindarneye û îbadet û bawerî wîjdanê şaran rê bimanê. Wa karê dînî û dewlete yewbînan ra cîya bêrê kerdene. Nasnameyê ke bawer kenê û  bawer nêkenê wa xo azad îfade bikerê.Hz. İbrahimî ra heta Hz. Muhammedî peygamberî û êyê ke rêçê înan de şîyî tim haştîye, azadîye û edalet waşto û semedê nê kede daya. Sere de Tevrat, Încîl û Qûran heme metnê dînî û bawerî vanê  kede erco bimbarek o, haştîye û edalet fermanê verênî yê Hûmayî yê. Ayeto ke her hewte hutbeyê îneyî de yeno wendene de zî semedê edaletî yeno vengdayene.  Reyna Qûranî Mekke de tewr verî azadîya koleyan waşte. Heme kitabanê bimbarekan de yeno vatene ke ganî merdim kede, kesayet, keye, ziwanê dayîke, kultur,  welat û şarê xo bipawo. Derheqê muhîmîya haştîye û edaletî de xeylêk ayetî û hadîsî est ê.

Hz. Muhammedî Pêkerdişê Medine û Hudeybîye de semedê haştîye bi pêro şertî qebul kerdî. No zî mojeneno ke haştîye senî muhîm a. Hûma vano; 'Ey merdimî! Bê şik ma şima yew camêrd û cînî ra afernayî, seba ke şima yewbînan nas bikerê, ma şima sey kavîm û kabîleyan kerdî cîya',  'Cîyabîyayîşê ziwan û renganê şima ayatanê Hûmayî ra yo.' No zî ahengê pîya ciwîyayîşî mojneno ma. La seserrî yo rejîmê otorîterê ke xo sey îslamî pênas kenê  senî ke vera fermanê Hûmayî û Resulê ci meydan biwanê înkar û asîmîlasyonî esas genê. Zorba û zalimê ke nameyê dînî şuxulnenê her qeydê zextan kenê. Ewro zîndanan de tepişteyê nêweşî mergî rê ameyî caverdayene. Cenazayanê kurdan rê îşkence yeno kerdene û mezelê ci yenê rijnayene. Cenazaya Dayîke Taybete yew hewte kuçe de erd de mend. Çîyo wînayên qet yew dînî de çîn o. Hutbeyo kurdkî qedexe yo. Melayanê ke mewlîdo kurdkî wend erzîyayî zîndanan. Êyê ke vanê ê rayîrê Hz. Muhammedî de yê hem welat de hem teberê welatî de semedê mefeatê xo îlkeyanê haştî û edaletî yê îslamî genê bin lingan.

Rixmo ke Hz. Muhammed heqanê cinîyan muhîm vîneno û paştî dano ci mezhebanê ci de vera cinîyan tewiro xelet est o. Cinîyî heqanê xo tewr bingeyênan ra mehrum ameyî verdayene û raştê zulmî ameyî. Pê tay metnanê dînîyan ê xeletan şîdetê vera cinîyan ame meşrûkerdene. Qetilkerdişê cinîyan, zewajê domanan, astengkerdişê perwerdeyê cinîyan, babetê winayênî pêro pê nê metnanê dînîyan ê probleminan ameyî kerdene. Ma sey Masaya Îslamî ya HDPyî vanê ke nê caardişî ke vera cinîyan yenê kerdene îslamî nîyê. Nasnameyê cinîyan nêeşkeno nêvînayîşî ra bêro. No vera îslamî neheqîya pîle ya. Ma qerardarê ke îqtîdaro ke dînî goreyê menfeatê xo şuxulneno teşhîr bikerê û şarê xo rê raştîyan vajê. Tarîxê îslamî de sere de Ehlîbeyt heme meleyê mezheban seba ke teklîfê halîfeyanê qesran qebul nêkerdî zîndanan de raştê îşkenceyî ameyî.  Qehremano xoverdayox ê tarîxê îslamî ra Ebu Zer pê nê vatişê xo; 'Mislimano ke vêşan bimano û pê kalbeyê xo vera îqtîdarî sere wemedar, ez ey rê eceb manena.' Rayîr mojneno.''