Endamê Konseya Rayberdişî ya KCKyî Mustafa Karasuyî beşdarê bernameyê Dilistanî yê Dengê Welatî bî. Karasuyî qala embaza xo Sakîne Cansiz (Sara) kerd ke Cansize ronayoxanê PKKyî ra yew a û 9ê çeleyê 2013î de Paris de ameye qetilkerdene.

Tay beşê qiseykerdişê Karasuyî yê derheqê Sakîne Cansiz de wina yê:

''Ez Sakîne Cansiz, Fîdane Dogan û Leyla Şaylemez  bi mînetdarî, heskerdişî yad kena. Hesretê înan, waştişê înan ê azadîye bi têkoşînê ma do ser bikewê û Kurdîstano Azad do bêro awankerdene.

Dêrsim de keyeyê ciwanan bî Sakîne zî şîyêne uca. Nê keyeyî ra dima tewr bîye.  Rayberîye reyde zî serra 76-77î de uca de bîye şinas. Nêzdîbîyayîşê rayberîye yê bi Dêrsimî tesîrê Sakîne û embazanê dêrsimijan kerd. Wexto ke Rayber Apoyî xeta azadîye ya cinîyan aver berdêne na xete bi şorişgêrîye pabest. Wexto ke ma embaze Sara ra behs kenê ganî ma biewnê tarîxê Dêrsimî. Çunke rastîya cinîya Dêrsimî embaze Sara ser o xo mojna ra. 

Sara perwerîya Rayberîye bîye. Senî ke Rayberîye girîngîye daye Dêrsimî ser o hende girîngîye daye Sara ser o zî. Embaze Sara pê Rayberîye, xeta Rayberîye bawer bîye. Tewr zaf Dêrsim de xeta Rayberîye wayîrê embazanê cinîyan vejîyaye.Embaze Sara bîye raybera xeta azadîye ya cinîyan. Embaze Sara 1980an de bi tewirê xo yê vera zîndanan û qereqolan bîye efsane. Têkoşînê embaze Sara kerd ke cinîyî tewrê têgêrayîşî bibê.

Embaze Sara îşkenceyan de îfadeyan de îradeyêko pîl mojna. A tewrê pêo xoverdayîşanê zîndanan bîye.  A tewrê xoverdayîşê 1983î zî bîye. Xoverdayîşê çeleyê 84î de zî tewrê grevê vêşanîye bîye. Dima ke zîndan ra vejîyaye verê xo da koyan. Xora kes nêeşkayêne aye şaristanan de vindarno. Aye waşt ke biba gerîla.  Bi qiseykerdişê xo, şîyayîşê xo, bi tewirê xo cara tam yew gerîla bîye. Hetê fîzîkî ra cara zaf bihêz bîye.Dima ke perwerdeyê Rayberîye dî şîye Botan û tewrê gerîlayan bîye. Şîye koyan û uca de embazan rê bîye moral. Cayo ke a tede bîye têna coş estbîyêne.

Sara kesêke bîye ke wendêne, fikirîyayêne, nuştêne. Hetêkî ra zî tede îdeolojîyê kulturelî estbî. Naye ra uslubê xi bihêz bî. Sara merdiman ser o tesîr kerdêne, tede tewirêko zanaye estbi.Têna mîyanê têgêrayîşî de ney teber de zî eşkayêne pêro merdiman reyde têkilî biviraza. Embazanê xo ra zaf hes kerdêne. Eşkayêne seba embazanê xo xo cade feda bika. Her kes pê Sara bawer kerdêne.Têkilîya ci ya bi merdiman têna teorîk ya zî îdeolojîk, polîtîk nêbîye. Qetilkerdişê aye ra dima zaf kesî wayîrê ci vejîyayî. No mojneno ke aye temsîlîyeta îdeolojîyê ma bi hawayêkê serkewteyî ard ca.Seba Şorişê Rojawanî vanê şorişê cinîyan. Xora o çax zî têkoşînê azadîye yê cinîyan yeno vîrardene. Rayberê ney Rayber Apo yo. Embaze Sara zî mîsala nê têkoşînî ya. Temsîla caardişê nê têkoşînî ya. Sara şîye ça uca de tesîrê cinîyan kerd. Embaze Sara wextêkê dergî Rojawan de xebitîya. Xeta embaze Sara, têkoşînê aye, tewirê aye Şorişê Cinîyan ê Rojawanî ser o zaf tesîr kerd. Coka Şorişê Rojawanî de keda embaze Sara zaf pîl a."