Endamê Komîteya Rayberdişî ya PKKyî Murat Karayilanî ANFyî rê qisey kerd, Şorişê Rojawanî yê 19ê Temmuze, xoverdayîşê gerîlayan ê Zap, Avaşîn û Metîna, girîngîya yewîya neteweyî û rewşa peyêne ya PDKyî ercnaye.

Qiseykerdişê Murat Katayilanî ra beşêk wina yo:

''Ez Roşanê Qurbanan ê pêro alemê Îslamî û şarê ma fîraz kena. Ez bi wesîleya serrgêra 9. ya Şorişê Rojawanî şorişê şarê ma, Rojawanî fîraz kena. Şorişê Rojawanî paradîgmaya demokratîke-ekolojîke ser o ronîyaye. Şorişê Rojawanî şorişê kurdan, ereban, sûryan, armenîyan û pêro şaranê bînan o. Şorişê Kurdîstanî DAÎŞ çin kerd û pêro dinya belayêka pîle ra xelisnaye. Ewro modelê Rojawanî pêro dinya rê numûne yo. Wezîfeyê her welatperwer, şorişgêr o ke Şorişê Rojawanî bipawê, şarê Rojawanî rê hemkar bê. 

Vera şerê zereyî yê kurdan xeylêk xîretî ameyî kerdene. Ma derheqê ablûqaya PDKyî de tay eşkerayîyî dabi. Nê xîretan ra dima têgêrayîşê winasênî tay vindertî. Embaz Cemîl Bayikî zî eşkera kerd ke Mesud Barzanîyî hunermendan rê vato heta ke o weş bo rayîr nêdano birakûjî. Ma pê nê vateyî kêfweş bîyî. Hînî ma na babete de çîyêk nêvanê. Eşkerayîyê ma yê verênî derbazdar ê. 

Dewleta tirke konseptêkê neweyî ser o têgêrena û wazena sînoranê xo hîra bikera. No konseptê îşxalî yo. Di serrî mendî ke Peymana Lozanî biqeda. Na peymane ra semed Kurdîstan bi çar parçeyî û kurdan rê neheqîye ameye kerdene, zulm ame kerdene. La Tirkîya vana înan rê neheqîye ameye kerdene û nika a wazena Helebî ra heta Mûsil û Kerkûkî bigêra. Nika gereka ma vera nê plananê Tirkîya bibê yew, yewîya xo awan bikerê. Gereka ma 2023 pê stratejîyêka hempare pêşwazî bikerê. Mabênê ma de meseleyî estê raşt o. Gereka ma nê meseleyan safî bikera. Ma nêwazenê qet yew partîya kurdan qels biba, ma nêwazenê çew PDK qels bikero yan zî YNK zerar bivîno. Dewleta tirke vana 'Meseleya ma têna bi PKKyî esta.' No raşt nîyo. Meseleya dewleta tirke pê pêro kurdan esta. Eke kurdî gonîya yewbînan birijnê ma do 100 serranê bînan zî vînî bikerê. O çax felaketo raştikên do bêro ma sereyî. Coka yewîya neteweyî zaf girîng a. Ganî ma seba ney têbigêrê, bixebitê.

86 rojî yo hêrişê vera Zap, Metîna û Avaşînî dewam kenê. Dewleta tirke şer ardo heta zereyê Başûrî. Eke gerîlayî nêgêrîyayî binê ablûqa, rayîrê înan nêrê birnayene, îstîxbarat nêro dayene dewleta tirke hêzê ma yê gerîlayî eşkenê vera dewleta tirke xo ver zî bidê, înan çin zî bikerê. Eke gerîlayî înan çin bikerê no do pêro kurdan rê fayde bikero. Şero esasîn Avaşîn de yo. La dewleta tirke dewanê herêmanê Başûrî dana bombayan ver ke çimê şarî bitersna û herême veng bikera. Avaşîn de dişmenî dormeyê Mamreşo, Banista, Mêzê, Merwanîsî girewto. Dişmen keno ke xo biresno werteyê Avaşînî. 40 rojî yo zî Werxêlê de şer qewimîyeno. Dewelta tirke vera ma çeka kîmyewî şuxilnena. Ma derheqê babete de eşkerayîyî dayî la dinya seke lal û ker a çîyêk nêvena. Gerîlayî 86 rojî yo pê çêrîye û felsefeya Rayberîye destanan nusenê. Bombardumanê ke dewleta tirke vera ma kena, Vietnam de zî nêdîyayî. Nê çêrîyê ke embazanê ma, şehîdanê ma mojnayî serkewtişê kurdan nîşan kenê. 

Ez 33 ciwananê ke Pirsûs de ameyî qetilkerdene û cinîya kurde ya ciwane Denîze Poyraza ke Îzmîr de ameye qetilkerdene bi rêzdarî yad kena. Îşxalê Tirkîya esasê konseptê qirkerdişî ser o vera şarê ma şer keno. Merkezê nê şerî zî Îmrali yo. Tecrîdo ke dewleta tirke zîndanê Îmraliyî de kena dinya de nêdîyaye. Rayber Apo vera ney xoverdayîşêkê bêhempayî keno. Têkoşîn û xoverdayîşê tepişteyan ê vera tecrîdî zî zaf manadar o.Dewleta tirke hêrişê elewîyan, kurdan, HDPyî kena. Hêrişê tewr hîrayî zî vera gerîlayan yenê kerdene. Erdogan şîyo Amed. Çîyê ke uca de ey vatê pêro zûr ê, metodê şerê psîkolojîkî yê. Erdoganî vato înan nê ma masaya prosesê çareserîye qeldaye ra. No raşt nîyo. Serêkanîyê de di polîsî kişîyayî la hema zî nêzanîyeno ke kamî no kerd. Xora ney ra dima tecrîdê Îmraliyî reyna dîya destpêkerdene. 6 serrî yo şarê ma, gerîlayî, zîndanî û waro sîyasî yê kurdan vera sîyasetê qirkerdişî, hêrişanê faşîzanan şer kenê. Dişmen hînî verê rijîyayîşî de yo û dewaya azadîya kurdan, dewaya azadîya bindestan û demokrasîyê Tirkîya her roje ra zêdêr nêzdîyê serkewtişî yo.''