Hemserekanê KCDK-E derheqê hêrişanê îşxalî yê dewleta tirke de eşkerayîyêke daye. 

Eşkerayîye de ame parekerdene ke dewleta tirke peyê îşxal û qirkerdişî de ya û vera gerîlayan çeka kîmyewîye şuxilnena. Eşkerayîye de wina ame vatene: ''Dewleta tirke pê SÎHAyan Kampa Multecîyan a Mexmûrî dana bombayan ver, Şingalî rê gefan wanena. Senî ke seba wayîrvejîyayîşê Şorişê Rojawanî prosesê Kobanê de kurdîstanijê Ewropa, bi mîlyonan ewropayîjan reyde vejîyayî waran, nika zî bi ruhê Kobanê ma wayîrê Rojawanî û şerwananê azadîye vejîyenê.

Dewlete û dezgehê Ewropa vera hêrişanê dewleta tirke bêveng ê. Na bêvengîye yena manaya hemkarîya sûcî. 

11ê hezîrane de asta dinya de ma her ca de vengê xo berz bikerê; Kurdîstan, Rojawan û gerîlayan pîya bipawê. Ma venga pêro şaran danê ke bi şîarê 'Defend Kurdistan-Kurdîstanî Bipawê' tewrê çalakîyanê 11ê hezîrane bibê. Reyna 25ê hezîrane de bi şîarê 'Vera hêrişanê îşxal û kîmyewîyan Kurdîstanî bipawê' şaristanê Dusseldorfî yê Almanya de rayraşîyayîşo merkezî do bêro kerdene. Ma seba nê rayraşîyayîşî seferber bibê.''