Hemserekîya Konseya Rayberdişî ya KCKyî bi wesîleya Roja Cinîyan a 8ê Adare eşkerayîyêke daye. Eşkerayîye wina ya:

‘’Ma 8ê Adare roja têkoşîn, paştdayîş û yewîya cinîyan pêro cinîyan û şaran rê fîraz kenê. Ma pêro cinîyan ê şehîdan bi heskerdiş, rêz û minetî yad kenê.

Cinîyî ewro tena seba heqanê xo ney seba demokrasî û azadîye zî serkêşîya komelî kenê. Têkoşînê cinîyan bîyo têkoşînêko global. Ewro meseleya azadîya cinîyan bi hawayêkê dîyarî verê xo dana merkezê têkoşînanê komelkîyan. Têkoşînê cinîyan o global pêro têkoşînanê nê dewrî ra zêdeyêr xo resneno astêka globale.

Serranê peyênan de zêdîyayîşê hêrişanê vera cinîyan, qetilkerdişê înan û hêrişê vera têkoşînê cinîyan mojnenê ke sîstem cinîyan sey hêzê şorişgêrî yê serekeyî vîneno. Bi hawayêkê zelalî ameyo îsbatkerdene ke nakokîya seserra 21ine ya sereke nakokîya cinîyan a û dînamîkê têkoşîn û hêzê şorişgêrî yo sereke yo. Sîstemê modernîteya kapîtalîste xîret keno ke cinîyan teslîm bigêro û têkoşînê cinîyan çin bikero.

Ma bi tecrube û hêzê xo yê komelî 8ê Adare bi ‘Manîfestoyê Haştîye û Komelê Demokratîkî’ yê Rayber Apoyî pêşwazî kenê. Têgêrayîşê azadîya cinîyan ê Apogîrî pêro prosesanê têkoşînî de rolê xo yê serkêşîye kay kerd. Cinîyî bîyî temînatê xeta Rayberîye û azadîye. Serkêşî û têkoşînê cinîyan prosesê verê ma de zî do rolêkê serekeyî bikerê.

Vengdayîşê ‘Haştîye û Komelê Demokratîkî’ yê Rayber Apoyî seba cinîyan zî zaf girîng o. Çunke no vengdayîş çareserîya meseleya azadîya cinîyan armanc keno. Bê cinîyan haştîya komelkî û demokratîkbîyayîş mumkîn nîyê. Cinîyî temînatê azadîye û demokrasîyî yê. Dewrê komelê demokratîkî dewrê cinîyan o.

Rayber Apo seba têkoşînê şarê kurdî, şaran û seba têkoşînê cinîyan girîng o. Coka cinîyan vat ke ‘Azadîya Rayber Apoyî azadîya ma ya.’ Proseso newe azadîya Rayberîye zî nêzdî keno.

Ma pê bawer ê ke pêro cinîyî û şarê ma do 8ê Adare de verê xo bidê waran, bi ruh û têkoşînî na roje pêşwazî bikerê û Newroze de hişmendîya xo biresnê asta tewr pîle. Serkewtişê nê prosesê neweyî bi azadîya Rayber Apoyî mumkîn o. Ma bi na bawerîye pêro cinî û şaran selam kenê. Ma ancî 8ê Adare her kesî rê fîraz kenê.’’