Wekîlê HDPyî yê Îstanbulî Alî Kenanogluyî derheqê kampanyaya 'Elewîyan rê heqê hemwelatîya têdûşte' de ANFyî rê qisey kerd ke kampanya hetê Komîsyonê Şaran û Bawerîyan ê HDPyî ra yena caardene.

Kenanogluyî vist vîrî ke elewîyî wextê Selçukîyan, Osmanîyan û Komara Tirkîya de tim maruzê xespê heqan mendî. Kenanogluyî vat: ''HDP derheqê elewîyan de xebatanê girîngan keno. Ma xebetanê xo ra raporêk amade kerd û gêrayî çareserîye. Meseleyê elewîyan ganî Meclîs de, mîyanê sîstemê demokrasî de bêrê çareserkerdene. Na kampanyaya ma seba partîyanê bînan û xebatanê bînan zî sey nimûne ya. Reya verêne kampanyaya winasêne yena kerdene. Elewîyî Dêrsim, Koçgirî, Meraş, Çorum, Sêwas, Taxa Gazî û Gezî de ameyî qirkerdene. Ganî dewlete verî nînan de têrî bêra. Bi nê hawayî travmayê elewîyan zî do weş bibê.

Tirkîya de elewîyan ser o propaganda kerdiş zaf asan o. Heta ke Tirkîya de demokrasîya raştikêne awan nêba elewîyî tim do hedefê gefan de bibê. Dewlete cemxaneyan zî sey unsurêkê gefî nîşan kena. Mîsal polîsî nêeşkenê bierzê serê camîyan la erzenê serê cemxaneyan. Çunke camî çarçewa qanûnan de îbadetxane yo. Seba ke verê kerdişanê winasênan bêro girewtene ganî cemxaneyî hetê qanûnan ra sey îbadetxaneyî bêrê qebulkerdene.''

Kenanogluyî bale ante ser ke CHP û AKP meseleyanê elewîyan de zerrî ra eleqedar nêbenê û nêwazenê statuyêkî bidê elewîyan. Kenanogluyî vat: ''Sey îbadetxane qebulkerdişê cemxaneyan yan zî bi qanûnan şinasîyayîşê elewîyan sey meseleya asayîşî yena dîyene. No çi destpêkê Komara Tirkîya ra nata sey konseptî dewam keno. AKP nika serkêşîya nê konseptî keno. Coka AKP do meseleya elewîyan qetî çareser nêkero. Kemalîstî, îqtîdarê AKP-MHP û hemkarê Kemalîzmî pêro sey meseleya asayîşî ewnîyenê elewîyan, çarçewa konseptê asayîşî de elewîyan ercnenê.''