Rêxistinanê heqanê merdiman kombîyayîşê çapemenîye viraşt û waşt ke cenazeyê ke hîrê serrî cuwa ver Goristanê Garzanî ra ameyî remnayene û ameyî berdene Sazîya Tibê Edlîyî yê Stanbolî wa teslîmê keyeyanê înan bibê.
Goristanê Garzanî yê Bedlîsî de mezelî ameyî weşanayene û 267 cenazeyî ameyî remnayene û nînan ra 265 cenazeyî 19’ê Kanûn a 2017’î ra Sazîya Tibê Edlîyî yê Stanbolî de yê.
Komeleya Heqanê Merdiman (ÎHD), Kongreya Şaran a Demokratîk (HDK), Komeleya Paştdayîşê Keyeyanê Merdimanê Vînîkerdeyan (ANYAKAY-DER) û Komeleya Weqfê Haştîye Beyoglûyê Stenbolî de kombîyayîşê çapemenî verişate û waşt cenazeyê ke goranê înan ra ameyî vetene wa peyser teslîmê merdimanê înan bibê.
Tirkîya û Kurdistan de Hewcedarîya Haştîye Esta
Hemsereka pêroyî ya ÎHD’yî Eren Keskînê goran ra vetişê cenazeyan sey bêhurmetîya dewlete ya vera merdeyan name kerde û va: ‘‘2017 ra nata keyeyê wazenê cenazeyena xo peyser bigêrê û muracatê ÎHD’yî kenê. La keyeyan rê zulim yeno kerdene û cenazê înan nêdîyenê înan. Tirkîya û Kurdistanî de haştîye rê hewcedarîye esta.‘‘
Wa Mezelêkê Ma Bibo ke Ma Roşan de Ser o Dûa Biwanê
Bi nameyê keyeyan zî Rewşan Donere zî waşt ke ca de cenazê înan bêrê dayene û va: ‘‘Ma wazenê ke mezelê ma bibo ke ma roşan de serê dûa biwanê. Seserre zî şiro ma do mucadeleyê xo rê dewam bikerê.‘‘
