Birayê Rayberê Şarê Kurdî Abdullah Ocalanî Mehmet Ocalan û warisê ci Mazlûm Dînçî muracatê Serdozgerîya Komare ya Bursa kerd ke mabênê tarîxanê 27-30ê nîsane de şirê Îmrali.

Avûkatanê Rayberê Şarê Kurdî Abdullah Ocalanî Rêzan Sarica, Razîye Turgut, Îbrahîm Bilmez û Serbay Koklu zî muracatê Serdozgerîya Komare ya Bursa kerd ke eynî tarîxî de nîsane de mîyanê şert û mercanê musbetan de pêvînayîş bikerê.

Avûkatanê Ocalanî badê 8 serran 2 û 22ê gulane û 12 û 18ê hezîrane û 7ê tebaxa 2019î de Ocalanî dir pêvînayîş viraştbi. Waştişê pêvînayîşanê ke verî cu bi keyfî ameyêne redkerdene 7ê tabexa 2019î ra nata nênê cewabkerdene.

Keyeyanê tepişteyan ê bînan ê Îmraliyî ra birayê Omer Hayrî Konarî Alî Konarî, birayê Hamîlî Yildirimî Polat Yildirim û waya Veysî Aktaşî Melîhe Çetîn zî bi rayîrê avûkatanê xo seba pêvînayîşî muracat kerd. Ame waştene ke eke pêvînayîşo rî bi rî nêro caardene bi rayîrê telefonî pêvînayîşêk bêro kerdene.