Tecrîdo giran ê serê Rayberê Şarê Kurdî Abdullah Ocalanî dewam keno. Muracatê pêvînayîş yê keye û avûkatanê ci yê ke her hewte yenê kerdene, yenê redkerdene. Endamê Meclîsê Partî yê DBPyî Îsmaîl Kinoyî derheqê babete de qisey kerd.

Kînoyî vat: ''Şarê kurdî û şarê binê ke Kurdîstan ciwîyenê RayberÊ Şarê Kurdî Abdullah Ocalanî semedê xo sey yew vîrî vînenî. Hêzanê hegemonan û hemkaranê cayîyan pê teslîmkerdişê Abdullah Ocalanî waşt têgêrayîşê kurdan biqedinê û vîrê Kurdîstanî çîn bikerê. Bado ke Birêz Ocalan pê komployê mîyanneteweyîyî ame tepiştene û Îmrali de ame hepskerdene, PDK sey temsîlkarê kurdan ame mojnayene. PDKyo ke qet eleqeya ci pê kurdîtîye çîn a kurdan sey temsîlkarê xo nêdî. Kurdî reyna pê felsefeya Birêz Ocalan têgêrayî û kerd ke paradîgmaya ci bîyarê ca. Şarê kurdî do çirey raştîya Birêz Ocalanî xo vîr ra mekero. Çunke Birêz Ocalanî kurdî prosesê çînbîyayîşî ra reyna ardî kerdî mîyanê şaranê dînyaya azade. Reyna semedê şaranê Rojhelata Mîyanênî zî têkoşîn kerd ke ê newe ra pîya bieşkê biciwîyê.''

Kînoyî bale ante tecrîdê Îmraliyî ser û vat: ''Têna kurdî nê, ganî roşnvîr, demokrat, şorişgêr, cinî û heta lîberalî ganî tecrîdê serê Birêz Ocalanî bişikinê. Ganî pêro bibê yew, fîkranê xo yê îdeolîkanê cîya cîyayan yew hetî de biverdê û pîya têbigêrê. Çunke hinî maskeyê hêzanê hegemonan ginenî war. Hinî pêro dinya zana ke Birêz Ocalan qey uca de yeno tepiştene. Ganî her kes fam bikero ke tecrîdê vera Birêz Ocalanî polîtîkaya vera ratşîya kurdan a. Ganî heme sîyasetmedarî nê şertanê tecrîdî bivînê. Xorîkerdişê tecrîdî têna polîtîkaya AKP-MHPyî nîya. Eynî wextî de polîtîkaya kurdan bêstatuverdayîşî ya hêzanê hegemonan a. Wazenê paradîgmaya Birêz Ocalanî bifatisnê. Coka ganî hêzê çep-sosyalîstî nê bivînê û goreyê ci têkoşîn bikerê. Çunke her hêrişo ke vera raştîya kurdan beno vera şaran ê Rojhelatê Mîyanên o.''