Hemserekanê KNKyî Ehmed Karamus û Zeynebe Murad derheqê hêrişanê Tirkîya yê vera Herêmanê Pawitişî yê Medya de eşkerayîyêke daye. 

Verî Ehmed Karamusî qisey kerd û îfade kerd ke dewleta tirke wazena pê hemkarîya PDKyî Başûrî îşxal bikera. Karamusî vat: ''Nê hêrişî pê hemkarîya pê hêzanê Başûrî dîyayî destpêkerdene. La nê hêrişî do faydeyê Başûrî nêkerê. Ma venga PDKyî danê ke cade nê tewirê xo yê hemkarî ra abigêro û goreyê menfaatanê kurdan tewirêkî bigêro. Ma sere de  venga Mesûd Berzanî, Mesrûr Barzanî, Nêçîrwan Barzanî venga pêro hêzanê Başûrî danê ke armancê dewleta tirke fam bikerê û hemkarîya dewleta tirke mekerê.. Ma şarê Kurdîstanî ra zî wazenê ke vera hêrişan têbigêro.''

Zeynebe Murad vat: ''Ma venga pêro şarê kurdî, bi taybetî venga şarê Behdînanî danê ke wa vera nê hêrişan hetê gerîlayan de ca bigêrê. Armancê dewleta tirke eşkera yo. Nê hêrişî vera destkewteyanê kurdan gefê pîlî yê.  Ganî ma pê ruhê yewîya neteweyîye vera nê hêrişan vinderê. Ma hêrişanê serê Şingalî zî şermezar kenê. Hetê bînî ra şermêko pîl o ke tay hêzê Kurdîstanî paştî danê hêrişanê dewleta tirke. ''