HDP verê kongreya xo ya pîle konferansê çarinî keno. Konferanso ke bi şîarê ''Xoverdayîşo Pîl Rayraşîyîşo Pîl''î Merkezê Kulturî yê Nazim Hîkmetî de yeno kerdene, do di rojî dewam bikero. Hemserekê Pêroyî yê HDPyî Pervîne Buldan û Mîthat Sancar û 684 delegeyî tewrê konferansî bîyî.

Dersime Dag, Îlknure Birol, Samet Menguç, Mahfuz Guleryuz û Tulay Hatimogullari semedê dîwanî ameyî vîjnayene. Roja verêne ya konferansî de do averşîyayîşê sîyasîyî û rewşa rêxistinkî do bêrê ercnayene û roja dîyine de zî xeta têkoşînê partîye ya ameyoxî do bêro destgirewtene. Qerarê ke tîya yenê girewtene do 3ê temmuze de teqdîmê kongre bibê. Badê qiseykerdişê akerdişî Buldane û Sancarî qisey kerd.

Pervîne Buldan vat: ''No îqtîdar bi hêrişanê xo yê vera cinîyan, elewîyan û kurdan wazeno payra bimano. Tirkîya têna bi çareserkerdişê meselaya kurdî eşkena demokrasî bîyaro. Ganî semedê dîyalog û muzakeran game bêro eştene. Semedê haştîye rolê Birêz Ocalanî gird o. Wextê muzakeran de hêvîya şarî ameyoxî ra bibî. Gama ke bêrê îmraliyî ameyî qefilnayene nê welatî de mergan dest pêkerd.  Wa her kes zaf hole bizano ke heta ke meselaya kurdî çareser nêbo demokrasî û azadîye nînê Tirkîya. Kam ke wazeno wa Tirkîya bibedilîyo wa semedê çareserîya meseleya kurdî têbigêro. No têna vengdayîşo sîyasîyî nîyo, şertê mecbûrî yê cuya demokratîke yo. Bedelê ci çi beno wa bibo ma do pîya bi şaranê Tirkîya heqê haştîye bipawê û meseleya kurdî bi rayîranê demokratîkî çareser bikerê.

Ewro vera Başûr û Rojwanê Kurdîstanî sîyasetê şer û îlhakî yeno rayraberdene.  No îqtîdar çayê dinya de yew destkewteyê kurdan esto ci rê dişmenîye keno. Nê hêrişî têna zirar nêdanê kurdan zirarê ci heme komelî rê est o. Têna bi qedîyayîşê sîyasetê şerî Tirkîya eşkena biba demokratîk. Çend rayîrê haştîye yeno qefilnayene Tirkîya de feqîrîye, vêşanîye sefalet zafêr beno. Sîstemêkî paştîya xo daya polîtîkayanê şerî hetê ekonomî ra welatî cûm keno. Ma sey HDP vanê ke bêrê pêro pîya nê sîstemî birijne ke wa şar nefes bigêro.

Ma Newroza Cizîre ra bi şarbîyayîşî heta ewro ameyî. Ma vera komployê mîyanneteweyî wela xo ra xo newe ra ganî kerd û heta nê rojan ameyî. Ma 8ê Adare, Newroze û 1ê Gulane de meydanan de hêzê xo kerd yew û mesajê rayraşîyayîşê ameyoxî dayî. Coka HDP û fikrê ci bin nêkewnê. Coka HDP nîno qefilnayene û do merê qefilnayene. Ma Kongeya xo ya pancine de têna ameyoxê partîya xo nê eynî wextî de qederê sîyasetê Tirkîya bewlî kenê.''

Mîthat Sancar zî vat: ''Rayraşîyayîşê ma yê bianorî yê HDPyî de zaf astengî vejîyayî verê ma, barîyerî ameyî ronayene. Ma  heme rijnayî û heta ewroyî ameyî. Tirkîya nika mîyanê krîzê xorî de ya. Îqtîdarî mîraso xirab û seserran dewr girewt, coka krîz dahîna xorîyêr bi. No îqtîdar bitaybetî 2015î ra nata bi sîyasetê înkar û îmhayî nêzdîyê meseleya kurdî beno. Her cayo ke kurdî tede yê  açarnayo warê şerî. Ewro Tirkîya mehkumê ti qutuban nîyo. Çare rayîrê hirêyin o. Çare progranê sîyasîyî yê HDPyî yo. Çare rayraşîyayîşê qerardarî yê şaran o. Çare ma de yo.

No îqtîdaro ke pê xorîkerdişê tecrîdê Îmraliyî û operasyonanê teberê sînorî wazeno payra bimano do sey îqtîdaranê verênen birijîyo.  No sîstem do miheqeq birijîyo. Îrade û hêzê şaran do nê sîstemî birijno. Ma do bibê aktorê bingeyî yê dewrê ameyoxî. Xora xoverdayîş karê ma yo. Ma do nê îqtîdarî bişawê û paştî medê zîhnîyetê sey înan. Ma do nê parlamentoyî bikerê cayê îradeyê hemparî yê şaran. Ma mecbur nîyê ke mabênê di xiraban vîjnayîş bikerê. Paştîya ma  ma ra pêt a. Hêzê ma est o. Ma eşkenê bi programê xo ameyoxê azadî û haştîya girde rone.''