Kongreya pêroyî ya 10 ya HDKyî dewam kena. Hemserekê KCDyî Leyla Guven û Berdan Ozturk, Hemserekê HDPyî Sezaî Temellî, Hemserekê DBPyî Salîha Aydenîz û Erene Keskîn, temsîlkarê zaf partîyan û dezgehan tewrê kongre bîyî ke Akar Otelê Anqara de ameye kerdene.

Hemserekê Komeleya Heqanê Merdiman (ÎHD) Ozturk Akdoganî kongre de qisey kerd û vat: "Tirkîya de şerê zereyî estî. No rejîmo faşîst hînî nêeşkeno îqtîdarê xo dewam biko. Şarê Tirkîya weçînayîşanê 31ê adare de mesajêko rind da. Ganî ma na xete ser o dewam bikê. Serra 2020î do biba serra çinbîyayîşê nê rejîmî û serra xoverdayîşî. Ganî ma reya verêne haştîye biwazê. Eke ma seba awankerdişê haştîye xîret nêkê tedaya nê rejîmî do biba zêde.

Sekreterê Pêroyî yê Konfederasyonê Sendîkayanê Kedkaran ê Umûmîye (KESK) Ramazan Gurbuzî vat: "Waşt ke bi vêşanîye û tepiştişan KESK çin bikê. Ma tîya ra reyna îfade kenê ke ma do heta peyênî hesabê na bêhuqûqîye bipersê.''

Serekê Pêroyî yê Komeleya Kulturî ya Pîr Sultan Abdalî (PSAKD) Ganî Kaplanî vat: "Ma sey komele waştişanê bingeyînan ê elewîyan ra verî seba ke aramîye û haştîya nê welatî ma do her çi bikê.''

Sereka Komeleya Paştdayîşî û Haştîye ya 10ê Teşrîna Verêne Mehtap Sakinci Coşgun vat: "Ma seba ke no sîstem nêreso armancê xo zaf xîret kerd. Ma pê sereberz ê. Qirkerdişêk do nêro vîrkerdene. Ma do qet haştîye ra û vervindertişê şerî ra fek vera nêdê.

Maya Haştîye Behîye Gokyuz vat: "Ma tim va haştîye û ma do tim wina vajê. Ê domananê ma kişenê ke ma bêhêz bikê. La ma hîna bihêz benê. Ez venga pêro dadîyanê leşkeran û polîsan dana domananê xo meşawê şerî. Dadîyî haştîye wazenê."

Serekê Partîya Karkeran a Sosyalîste ya Tirkîya (TSÎP) Turgut Koçakî vat: "Têkoşînê vera destsernayîşê şaredarîyanê HDPyî şert o. Îqtîdar tim qala şerî keno. Wezîfeyê ma astengkerdişê nê şerî yo. Ganî seba cewabê nê şerî hêzê demokratîkî pîya têbigêrê."

Hemsereka DBPyî Salîha Aydenîz vat: "Ma Tirkîya û Kurdîstan de ganî vera qirkerdişan vinderê. Ganî ma seba ameyox û azadîya xo têkoşînê xo bi nê hawayî dewam bikê. Ez zanena ke emser têkoşînê ma do bihempa bibo."

Hemsereka Partîya Newe ra Ronayîşî ya Sosyalîste (SYKP) Canan Yuce vat: "Kiştişê cinîyan, polîtîkayê şerî yê vera kurdan dewam kenê. Ganî ma sey HDK vera nê faşîzmî têkoşînê demokratîkî rê xizmet bikê. Ma ganî warê komelkî rêxistin bikê.''

Sereka Pêroyî ya Partîya Şorişgêre ya Yewbîyaye Elîfe Torun Oneren vat: "Seke dinya de yeno dîyene Tirkîya de zî sîstem keno ke şar bifetisno. No sîstem sîstemê ma ney sîstemê burjuvazî yo. Wesayîtê zirxînî hînî bîyî makîneya qetilkerdişê kurdan. Vera naye ganî têkoşîn û xoverdayîş dewam biko.''

Kongre bi wendişanê raporanê falîyetan dewam kerd.